Թեհրանը կրճատել է ուրանի հարստացման ծրագիրը հանուն անվտանգ մակարդակի: Այս հետեւությանն են հանգել ՄԱԳԱՏԷ-ի ներկայացուցիչները:
Գերատեսչության տվյալներով, Իրանը դադարեցրել է մինչեւ 20 տոկոս հարստացված ուրանի ստացումըՙ անջատելով Նաթանզի եւ Ֆորդոյի միջուկային օբյեկտների ցենտրիֆուգերի սնուցումը: Ի պատասխանՙ Արեւմուտքը խոստացել է վերացնել Իրանի օտարերկրյա ակտիվների անմատչելիությունը, հաղորդում է BBC-ն: Մոտ ժամանակներս ԱՄՆ-ը եւ Եվրոմիությունը պետք է ապաշրջափակեն իրանական 100 միլիարդ դոլարանոց ակտիվների 2,8 միլիարդը: ԵՄ իշխանությունները հայտարարել են, որ կես տարով կկասեցնեն հակաիրանական պատժամիջոցների կիրառումը: Դա վերաբերում է մասնավորապես բանկային եւ նավթային հատվածներին:
2013 թ. նոյեմբերի 24-ին «Վեցյակի» երկրների (ԱՄՆ, ՉԺՀ, ՌԴ, Մեծ Բրիտանիա, Ֆրանսիա, Գերմանիա) հետ Իրանի կնքած համաձայնագիրը ենթադրում է նաեւ Թեհրանի միջուկային նախագծերի կեստարյա կասեցում, 20 տոկոսանոց ուրանի բոլոր կուտակված պաշարների վերացում եւ Արաքի ծանրջրային ռեակտորի շինարարության դադարեցում:
Անցյալ շաբաթ Վիեննայում Իրանը եւ «Վեցյակի» երկրները պայմանավորվեցին եւս չորս ամիս շարունակել իրանական միջուկային ծրագրին նվիրված բանակցությունները: Հանդիպումից հետո ԱՄՆ պետքարտուղար Ջոն Քերրին հայտարարեց, որ խորհրդակցությունների ընթացքում «շոշափելի առաջընթաց է արձանագրվել էական հարցերի առնչությամբ», բայց դեռ մնում են զգալի տարաձայնություններ:
