Human Rights Watch միջազգային իրավապաշտպան կազմակերպության օրերս հրապարակած զեկուցագրի համաձայն, ԱՄՆ Հետաքննությունների դաշնային բյուրոն (ՀԴԲ, FBI) ամերիկացի մահմեդականներին «խրախուսել, դրդել եւ երբեմն նույնիսկ վարձատրել է» ահաբեկչական գործողություններ կատարելու համար: Կազմակերպությունը Մարդու իրավունքների ինստիտուտի եւ Կոլումբիա համալսարանի հետ համատեղ ուսումնասիրել է ՀԴԲ-ին առնչվող 27 գործ եւ այդ կապակցությամբ հարցաքննել է 215 անձանց, գրում է ֆրանսիական «Լիբերասիոն» թերթը:
Մասնավորապես պարզվել է, որ ԱՄՆ կառավարությունը «շեքսպիրյան խեղկատակության ոգով» (դատավորի արտահայտությունն է) չորս անձանց ֆինանսավորել եւ դրդել է մի շարք հարձակումներ կազմակերպել սինագոգների եւ ամերիկյան մի ռազմակայանի դեմ: Մեկ ուրիշ դեպք է Ռեզվան Ֆերդաուսի գործը, որը մի ահաբեկչական գործողության մասնակցելու մեղադրանքով դատապարտվել է 17 տարվա բանտարկության: Նա պետք է Պենտագոնի շենքի վրա գրոհ կազմակերպեր պայթուցիկներով լցոնված փոքրիկ անօդաչու ինքնաթիռով: Իրականում այդ ծրագիրը մտահղացվել էր ՀԴԲ գաղտնի գործակալներից մեկի հետ սերտ համագործակցությամբ: Այդ ծպտյալ գործակալը ավելի ուշ բացահայտել էր, որ Ֆերդաուսը «ակներեւաբար» ունի հոգեկան լուրջ խնդիրներ:
Զեկուցագրի ամփոփիչ մասում նշվում է, որ ուսումնասիրված բոլոր դեպքերի մեջ ահաբեկչական գործողությունների փորձերի 30 տոկոսը ձեռնարկվել է որեւէ ծպտյալ գործակալի եռանդուն մասնակցությամբ:
