Արաբական պետությունների լիգայի անդամ երկրների արտգործնախարարները Կահիրեում կայացած խորհրդակցությունում պայմանավորվել են բոլոր անհրաժեշտ միջոցները ձեռնարկել դիմակայելու «Իսլամական պետություն» ահաբեկչական խմբավորմանը: Ռոյթեր գործակալությունը հաղորդում է, որ ընդունված բանաձեւը կոչ է անում «կասեցնել օտարերկրացի գրոհայինների թափանցումը Իրաք եւ Սիրիա, ինչպես նաեւ իսլամիստների ծայրահեղական խմբավորումների ֆինանսավորումն ու օժանդակումը»:
Դիվանագիտական աղբյուրները նշում են, որ արտգործնախարարները սկզբում հակված էին պաշտպանելու ԱՄՆ-ի ռազմարշավը «Իսլամական պետության» դեմ, սակայն բանաձեւի վերջնական տարբերակում բացահայտ պաշտպանություն չի արտահայտվում: Այդուհանդերձ արաբական երկրներին կոչ է արվում համագործակցել ԱՄՆ-ի եւ Իրաքի հետ:
Արաբական պետությունների լիգայի ղեկավար Նաբիլ ալ Արաբին իր ելույթում նշել է ահաբեկչության դեմ ռազմական, քաղաքական, տնտեսական եւ մշակութային պայքար մղելու անհրաժեշտությունը:
Ավելի վաղՙ սեպտեմբերի 5-ին կայացած ՆԱՏՕ-ի գագաթաժողովում ԱՄՆ-ի նախագահ Բարաք Օբաման առաջարկել էր միջազգային կոալիցիա ստեղծել ընդդեմ «Իսլամական պետության» գրոհայինների: Ամերիկացիները Իրաքի իշխանություններին օգնում ենՙ օդից հարվածներ հասցնելով ջիհադիստ ահաբեկիչների դիրքերին:
