Թուրքական «Durde» եւ ամերիկահայկական «Project 2015» կազմակերպությունները համագործակցում են նշելու Եղեռնի հարյուրամյակը Թուրքիայում, տեղեկացնում է «Արմինյն Միրոր-Սփեքթեյթր» շաբաթաթերթը: Նախատեսվում է հավաք Ստամբուլի «Թաքսիմ» հրապարակում, ինչպես նաեւ հիշատակի արարողություն Շիշլիի հայկական գերեզմանատանը, որտեղ թաղված է Սեւակ Շահին Բալըքջին: Վերջինս թուրքական բանակում ծառայող հայ զինվոր էր, որին 2011-ի ապրիլի 24-ին սպանեց մի թուրք զինվոր:
«Որպես հայեր մենք կոչ ենք անում Ստամբուլ գնալ հարգելու զանգվածային գազանությունների արդյունքում զոհվածների հիշատակը եւ հիշեցնելու աշխարհին, որ հարյուր տարի անց մենք շարունակում ենք արդարություն եւ փոխհատուցում պահանջել», նշել է Սարա լի Ուիթսոնը, «Project 2015»-ի վարչության ադամներից, ավելացնելով, որ շատերի համար դա կլինի առաջին այցելությունը դեպի նախնյաց երկիր:
Իսկ «Durde» կազմակերպության ներկայացուցիչ Լեվանտ Սենսեվերն իր հերթին ասել է. «Որպես թուրքեր ցանկանում ենք մեր զորակցությունը հայտնել հայերին եւ հարգանքի տուրք մատուցել ահավոր ոճրագործություններից տուժածներին: Մենք նաեւ կոչ ենք անում մեր կառավարությանը ճանաչելու Ցեղասպանությունը»:
«Durde»-ն մարդու իրավունքների պաշտպան հասարակական կազմակերպություն է, որը պայքարում է ազգայնամոլության եւ ռասիզմի դեմ: «Project 2015»-ը ոչ շահութաբեր ամերիկյան կազմակերպություն է, որի շարքերում ներառված են հայեր, թուրքեր եւ ամերիկացիներ:
