ԱՄՆ-ի իշխանությունները քննարկում են Եվրոմիության պետությունների համար այցագրային ռեժիմ սահմանելու հնարավորությունըՙ եթե ԵՄ կառավարությունները հրաժարվեն իրենց քաղաքացիների տվյալները փոխանցել ամերիկյան հատուկ ծառայություններին: Այդ մասին տեղեկացնում է գերմանական «Ֆրանկֆուրտեր Ալգեմայնե» թերթը: ԱՄՆ ներքին անվտանգության նախարար Ջեյ Ջոնսոնը արդեն հանձնարարել է մշակել անայցագիր մուտքի VWP ծրագրին առնչվող փոփոխություններ, որոնց շնորհիվ անհնար կդառնա ծայրահեղականների մուտքը ԱՄՆ: Ամերիկացի մի շարք սենատորներ ու կոնգրեսականներ ավելի վաղ հայտարարել էին, որ ԵՄ երկրների մեծ մասի հետ անայցագիր ռեժիմի գոյությունը լուրջ վտանգ է ստեղծում ԱՄՆ-ի ազգային անվտանգության համար:
Հանրապետական Չառլի Դենթը մասնավորապես կարծում է, որ «Իսլամական պետությանը» հարած եվրոպացիները «մեծ վտանգ են ներկայացնում ԱՄՆ-ի համար»: Ֆրանսիական «Շառլի Էբդո» հանդեսի խմբագրատանը կատարված ահաբեկչությունից հետո դեմոկրատ սենատոր, Սենատի հետախուզության հանձնախմբի ղեկավար Դայզեն Ֆայնստայնը VWP անայցագիր ծրագիրն ավանեց Ամերիկայի «աքիլլեսյան գարշապար»: Մոտ ժամանակներս նա կներկայացնի ներգաղթի համակարգի բարեփոխման օրինագիծ: Կոնգրեսական Դենթը առաջարկում է արդեն հիմա ներքին անվտանգության նախարարին կամ Ազգային անվտանգության գործակալության տնօրենին լիազորել «ժամանակավոր այցագրային ռեժիմ սահմանել այն երկրների նկատմամբ, որոնք բավարար չափով օգտակար տեղեկատվություն չեն տրամադրում ԱՄՆ-ին»: Կոնգրեսականը նաեւ նշում է, որ սեպտեմբերի 11-ի ահաբեկչությունն իրականացնողների մեծ մասը ԱՄՆ էր եկել Եվրոպայից:
ԱՄՆ-ը ԵՄ-ից վաղուց պահանջում է վերջինիս այն բոլոր քաղաքացիների ցանկերը, որոնք կասկածվել են արմատական իսլամին հարելու մեջ: Գերմանիայի իշխանությունները օրինական հիմքեր չեն տեսնում անձնական տվյալների փոխանցման համար, գտնելով, որ մարդը վտանգ է ներկայացնում լոկ այն դեպքում, եթե «փաստերը հաստատում են ենթադրությունները, թե տվյալ անձը կարող է կատարել նշանակալի հանցագործություններ»: Փետրվարի 9-ին նախագահ Բարաք Օբամայի եւ կանցլեր Անգելա Մերկելի բանակցությունների ժամանակ մասնավորապես խոսվել է անձնական տվյալների փոխանցման հարցի մասին: «Ֆրանկֆուրտեր Ալգեմայնեն» նշում է, որ VWP անայցագիր մուտքի ծրագրին մասնակցում են ԵՄ բոլոր պետությունները, բացի Լեհաստանից, Բուլղարիայից, Ռումինիայից, Խորվաթիայից եւ Կիպրոսից:
