Երեքշաբթիՙ մարտի 24-ին Բարսելոնից Դյուսելդորֆ ուղեւորվող Airbus A 320 օդանավի աղետի մասին իրազեկվելով, շտապեցինք նույն օրը տեղեկատվություն ստանալ Դյուսելդորֆի օդանավակայանից, գերմանական Germanwings-ից: Առաջին երկուսը մեզ ուղղորդեցին դիմել Դաշնային արտգործնախարարություն: Զոհերի ինքնության հետ կապված ձեր հարցին, ցավոք, չենք կարող պատասխանել, անունները հրապարակել չենք կարող, ասաց ԳԴՀ արտգործնախարության աշխատակիցըՙ փոխանցելով, թե առաջին հերթին այն տրամարվելու է ընտանիքի անդամներին:
Հիշյալ պատասխանը թերեւս այդքան էլ տարօրինակ չէր լինի, եթե հինգշաբթի առավոտյան նույն խնդրին չանդրադառնային գերմանացիՙ ARD-ի մեր գործընկերները: Նրանց զարմացրել էր նաեւ այն հանգամանքը, որ մեկ օր առաջ մամուլի ասուլիս է հրավիրվում, իսկ հետո միայն «Նյու Յորք թայմսին» է հայտնի դառնում, որ օդաչուների խցիկում մի հոգի է եղել: Թեպետ արդեն պարզ է, որ 150 զոհերի թվում են Գերմանիայի 75, Իսպանիայի 50, ԱՄՆ, Մեծ Բրիտանիայի, Արգենտինայի, Ղազախստանի, Կոլումբիայի, Իրանի, Ավստրալիայի, Թուրքիայի, Մարոկկոյի, Ճապոնիայի, Մեքսիկայի, Վենեսուելայի, Իսրայելի, Չիլիի, Բելգիայի, Դանիայի եւ Նիդեռլանդների քաղաքացիներ եւ Մարսելի դատախազության տրամադրած տվյալների համաձայնՙ սեւ արկղի վերծանումից պարզվել է, որ օդաչուների խցիկում երկրորդ օդաչունՙ 28-ամյա գերմանացի Անդրեաս Լ.-ը, մենակ է եղել, չի արձագանքելՙ հրամանատարի խցիկ մտնելու ցանկությանըՙ դուռը չի բացել եւ ամենայն հավանականությամբ միտումնավոր է կործանել ինքնաթիռը, թե կրոնական, ահաբեկչական հիմք չկա, բայց, ինչպես ասում են գերմանացի լրագրողները, հարցերն առավել շատ են, քան պատասխանները, եւ առաջին հերթինՙ դեռեւս պարզ չէ, թե ինչն է մղել երկրորդ օդաչուին դիմել այդ քայլին, երբ վերջին րոպեներին սեւ արկղի ժապավենը նրաՙ առանց խոսքի, ծանր շնչառությունն է վավերացրել, ուրեմն գիտակցությունը կորցրած չի եղել: Ինքնասպանությո՞ւնՙ զանգվածներին զոհելու հետ մեկտե՞ղ: «Երբ մեկը 149-ին իր հետ մահվան է տանում, ինձ համար ուրիշ բառով է բնութագրվում, քան ինքնասպանություն ձեւակերպումն է», փոխանցում է Լուֆթանզայի ղեկավար Շփորը:
Ըստ սեւ արկղի տվյալների, ինքնաթիռի օդ բարձրանալուց հետո, 20 րոպե լսվում է երկու օդաչուների նորմալ գերմաներեն խոսակցությունը, հետո ավագ օդաչուն զուգարան է գնում, նախապես կրտսերին ցուցում տալովՙ ինչպես վարել օդանավը: Ավտոմատ փակվող ու միայն ներսից բացվող դուռն ամենայն հավանականությամբ չի բացվել այնուհետ, քանի որ երկրորդ օդաչուն խափանել է այն միտումնավոր: 144 ուղեւորները, մեծ հավանականությամբ, մինչեւ ամենավերջին վայրկյանը չեն նկատել օդանավի կործանումը:
Գերմանական n-tv-ի լրագրողը զրուցել է գերմանական Մոնտաբաուրում ծնված 28-ամյա օդաչուին ճանաչողների հետ: Նրան բնութագրել են որպես զուսպ, «քաշված» երիտասարդի: Germanwings-ից հայտնել են, որ նա աշխատունակ է եղել: Գերմանական լրատվամիջոցները հույս են հայտնում, թե առայժմ առեղծվածային շատ հարցեր իրենց պատասխանները կունենան, երբ գտնվի օդանավի երկրորդ ձայնագրող սարքը:
