Դոկտ. ՌՈՒԲԻԿ ՍԱՐԴԱՐՅԱՆ, Թեհրան
2015 թվականի փետրվարի 19-ին տեղի ունեցավ Թեհրանի Հայոց թեմի հերթական Պատգամավորական ժողովի նիստը, որտեղ քննարկվեցին տարբեր հարցեր ու տրվեցին տարբեր գնահատականներ: Առանձնացնում ենք խոսքերը դաշնակցական պատգամավոր պրն. Սեդրակ Գոջամամյանի, որ պարզորեն արտահայտեց ու իր գնահատականը հնչեցրեց Անթիլիասի ու Էջմիածնի հոգեւորականների մասին: Նախ` նա իր զայրույթը հայտնեց այն հարցի կապակցությամբ, թե իբրեւ Թեհրանի Հայոց թեմի Պատգամավորական ժողովում կան այնպիսի մարդիկ, որոնք ավելի շուտ համակրում են Էջմիածնին, այլ ոչ թե Անթիլիասին: Նրա կարծիքով, նման մարդկանց տեղը ԹՀԹ-ի Պատգամավորական Ժողովը չէ: Այնուհետեւ նա արտահայտեց իր «փայլուն» միտքը, որ իբր Անթիլիասի բոլոր հոգեւորականները ազգային են, իսկ Էջմիածնի հոգեւորականները` ապազգային, ու նրանք հեռու են ազգային լինելուց: Ցավալի է լսել այսպիսի եզրակացություն դաշնակցական պատգամավորից: Նման անհիմն ու գռեհիկ գնահատականը կարող է հնչեցնել միայն Էջմիածնի դեմ չարությամբ լցված հասարակ մեկը:
Ստորեւ կանդրադառնանք միայն մի քանի հարցերի, որպեսզի բացահայտվի այդ անհիմն ու պարզունակ գնահատականի բնույթը:
Նման ընդհանուր գնահատականի արծարծումը հասարակ, բայց ոչ հասարակական ու քաղաքական սկզբունքներին ծանոթ մի անձնավորության գնահատական է, որից պետք է խուսափեն մեր հայ ազգային ու հասարակական գործիչները:
Ղարաբաղում եւ ընդհանրապես Հայաստանում բազմաթիվ հոգեւորականներ կան, որոնք գտնվելով Արցախյան պատերազմի առաջին գծում, իրենց կյանքն են վտանգի ենթարկել, մինչդեռ Անթիլիասից նման հոգեւորականների գտնելը շատ դժվար կլինի: Հիմա նման անձնազոհ հոգեւորականներին ապազգային պիտակ փակցնելով պրն Գոջամամյանը արդյո՞ք իրեն վատ չի զգում:
Իրանում եւ ընդհանրապես սփյուռքում Անթիլիասին պատկանող հոգեւորականների կարելի է հանդիպել, ովքեր հոգեւորական դաշտը օգտագործել ու օգտագործում են իրենց անձնական շահերի համար. արդյոք նրանց բոլորին անվանել «ազգային» ու էջմիածնականներին «ոչ ազգային», ճի՞շտ է: Իհարկե նման երեւույթների երկու աթոռներում էլ կարելի է հանդիպել, սակայն այստեղ մեկին լավ, մյուսին վատ ներկայացնելն է այդ կուսակցականի խնդիրը:
Հայտնի չէ, թե ինչ նպատակ է հետապնդում մեր հարգելի պատգամավորը նման արտահայտություն անելով:
Ցավ է պատճառում այն հանգամանքը, թե ինչո՞ւ ԹՀԹ-ի առաջնորդ Տ. Սեպուհ արք. Սարգսյանը նիստին ներկա լինելով, որեւէ ձեւով չի արձագանքել այդ մտքին ու իր լռությամբ հաստատել է նման թեթեւամիտ գաղափարը:
Այս հարցին պիտի արձագանքեն մեր Էջմիածնի ու Անթիլիասի առողջ հոգեւորականները ու թույլ չտան, որ մի կուսակցական պատգամավոր մեր ամբողջ հոգեւորականների համար նման դասակարգում սահմանի, նաեւ պետք է դատապարտեն այդպիսի մոտեցումը: Առաջին մարդը, որ պետք է արձագանքեր այս «փայլուն» գաղափարին, Թեհրանի թեմի առաջնորդն էր, ապա նրա ղեկավարՙ Արամ Ա վեհափառի պարտականությունն է սաստելը:
