Մայիսի 21-ին Հայաստանի Գրողների միության տանը նշվեց ամերիկահայ մեծահամբավ մտավորական-գործիչ, գրականագետ, վերլուծաբան ու խմբագիր Երվանդ Ազատյանի հոբելյանըՙ ծննդյան 80-ամյակը: Գնահատանքի ու սիրո խոսքեր ասացին Գրողների միության նախագահ Էդվարդ Միլիտոնյանը, ՀՀ մշակույթի նախարարի տեղակալ Ա. Պողոսյանը, Գիտությունների ազգային ակադեմիայի պրեզիդենտ Ռադիկ Մարտիրոսյանը, Մանկավարժական համալսարանի ռեկտոր Ռուբեն Միրզախանյանը, Ժուռնալիստների միության նախագահ Աստղիկ Գեւորգյանը, գրականագետներ Դավիթ Գասպարյանը, Պետրոս Դեմիրճյանը եւ Սուրեն Դանիելյանը, բանաստեղծ Արտեմ Հարությունյանը, «Ազգ» թերթի խմբագիր Հակոբ Ավետիքյանը: Ընթերցվեց ՀՀ նախագահ Սերժ Սարգսյանի շնորհավորանքի ու գնահատանքի գիրը, Թեքեյան մշակութային միության կենտրոնական վարչության ատենապետ դոկտ. Հարություն Արզումանյանի նամակը: Հոբելյարին հանձնվեցին շքանշաններ, հուշամեդալներ, ինչպես նաեւ Մանկավարժական համալսարանի պատվո դոկտորի տիտղոսը: Վերջում Վ. Թեքեյանից երկու քերթված արտասանեց կողակիցը` նկարչուհի Նորա Ազատյան-Իփեքյանը, սրտի խոսք ասաց Եր. Ազատյանը:
«ԱԶԳ»-ի հաջորդ համարում այս ձեռնարկին կանդրադառնանք ավելի հանգամանորեն:
