Տարածաշրջանային այցի շրջանակներում Երեւանում էր ԵԱՀԿ գործող նախագահող, Սերբիայի փոխվարչապետ եւ ԱԳ նախարար Իվիցա Դաչիչը: Հայաստանի արտգործնախարար Էդվարդ Նալբանդյանի հետ հանդիպումից հետո, երկու նախարարները հանդես են եկել համատեղ ասուլիսով, որի ընթացքում էլ Դաչիչը հայտարարել է. «Ադրբեջանն առաջարկում է ընդլայնել ԵԱՀԿ Մինսկի խմբի համանախագահների կազմը: Սա նոր առաջարկություն չէ…»: Հայաստանում շատերը Դաչիչի այս հայտարարությունից այնքան էին սարսափել, որ ուշադրություն չեն դարձրել նախարարի խոսքի շարունակությանը, ինչը թերեւս ավելի կարեւոր է: Դաչիչը շեշտել է. «…Բայց դրա համար (համանախագահների կազմի ընդլայնման) անհրաժեշտ է կոնսենսուս»:
Հիշեցնենք, որ Հայաստանը Մինսկի խմբի անդամ է, եւ եթե անգամ Խմբում բոլորը կողմ լինեն համանախագահների կազմի ընդլայնմանը` Հայաստանից բացի, ապա կոնսենսուս չի լինի, հետեւաբար կազմը չի ընդլայնվի: Ադրբեջանն էլ, ի դեպ, կարող է շատ բան առաջարկել, օրինակՙ ԼՂ հարցով միջնորդ նշանակել Թուրքիային, Պակիստանին եւ Իսրայելին… Հետո ի՞նչ:
