Ալյասկայի եւ Հավայան կղզիների բնիկ ժողովուրդները ՄԱԿ-ին դիմել են իրենց ինքնորոշման իրավունքն ապահովելու խնդրանքով: Ժնեւում ՄԱԿ-ի նստաշրջանում օրերս հրապարակված այդ հայտարարության մասին հաղորդում է «Ռեգնում» գործակալությունը:
Հայտարարության մեջ մասնավորապես ասվում է. «1959 թ. ԱՄՆ-ը Ալյասկայի եւ Հավայների տարածքները կլանեց խաբեության, ՄԱԿ-ի մանդատի ու սկզբունքների եւ ինքնորոշման պրոցեսի կանխամտածված խախտման միջոցով»:
Ալյասկայի եւ Հավայան կղզիների ներկայացուցիչներ Ռոնալդ Բառնսը եւ Լեոն Սիուն պարզաբանում են, որ 1867 թ. Ալյասկան ԱՄՆ-ին վաճառելու գործարքը Վաշինգտոնին չէր փոխանցում թերակզղու նկատմամբ ինքնիշխանության իրավունք, իսկ ԱՄՆ-ի 1893 թ. ներխուժումը Հավայան կղզիներ իրականացվել է ի խախտումն միջազգային իրավունքի եւ երկկողմ պայմանագրերի:
«Ալյասկա-Հավայներ դաշինք հանուն ինքնորոշման» համատեղ աշխատանքային խմբի ներկայացուցիչ Լեոն Սիուն հայտարարել է. «Մեր մշակույթը ճնշվում է: Վաշինգտոնի գործողություններն ուղղված են ոչ միայն մեր մշակույթի, այլեւ մոլորակի խաղաղության դեմ, քանի որ Հավայան կղզիներում է գտնվում «Փեռլ-Հարբոր» ռազմակայանը: Զորավարժությունների ժամանակ աղտոտվում են մեր հողն ու ջուրը: Դրա հետեւանքով մարդիկ հիվանդանում են: Դա չարաշահում է մեր հողի եւ ժողովրդի նկատմամբ: Մենք չենք ուզում լինել ռազմական մեքենայի մի մասը»:
