Տասնյոթամյա ջութակահար Սեմի Անտոնյանի համար առանձնաշնորհյալ պատիվ էր վերջերս նվագելու Բոստոնի «Պոպս նվագախմբի» հետ, «Սիմֆոնի Հոլում» կայացած 64-րդ տարեկան «Հայկական երեկոն Պոպսում» համերգի ժամանակ, տեղեկացնում է «Արմինյն Միրոր-Սփեքթեյթր» շաբաթաթերթը: Համերգը կազմակերպել է «Հայկական մշակույթի բարեկամների ընկերությունը»:
Ալան Հովհաննեսին նվիրված երեկոյի ընթացքում «Լինկոլն-Սադբերի ավագ դպրոցի» ուսանող Սեմին կատարել է նրա եւ Մենդելսոնի ստեղծագործություններից: Նա չորս տարեկանում թավջութակի վրա նվագելով է սկսել իր երաժշտական կարիերան, հետագայում անցնելով ջութակին: Իր հաջողությունների համար նա մեծապես պարտական է իր ծնողներինՙ Սամվել եւ Ջենիֆեր Անտոնյաններին եւ ուսուցիչներին: Երկրորդ կուրսում սովորելիս նա հաղթող է ճանաչվել Բոստոնի երիտասարդ սիմֆոնիկ նվագախմբի հովանավորած մրցույթում, որն էլ նրան հնարավորություն է տվել նվագելու Մենդելսոնի ջութակի կոնցերտը Մասաչուսեթսի Տեխնոլոգիական ինստիտուտի կազմակերպած համերգի ժամանակ: 2013-ին առաջին տեղն է զբաղեցրել «Ուոլդեն Չեյմբրի», «Նյու ինգլենդի ֆիլհարմոնիկի», «Վելոլի սիմֆոնիկի» եւ «Բրոքտոն սիմֆոնիկի» երիտասարդ նվագողների մրցույթներում: Իհարկե հեշտ չի եղել անցած ճանապարհը, բայց հետեւողական, տքնաջան աշխատանքի շնորհիվ նա կարողանում է հաղթահարել բոլոր դժվարությունները: 2008ից նա նվագում է «Բոստոնի երիտասարդական սիմֆոնիկ նվագախմբի» եւ «Նյու Ինգլենդի երաժշտանոցի երիտասարդական ֆիլհարմոնիկ նվագախմբի» կազմերում: Որպես առաջին ջութակ հանդես է գալիս «Օլ-Սթեյթ նվագախմբում»:
