Ակադեմիկոս Ռամիզ Մեհդիեւի «Լեռնային Ղարաբաղիՙ աղբյուրների վրա հիմնված պատմություն» գիրքը հրատարակվել է թուրքերենով, ծանուցում է ադրբեջանական «Ազերթագը» ՙ իր գերմանալեզու ընթերցողներին: Գիրքը Լեռնային Ղարաբաղի հիմնախնդրի պատմական արմատների մասին է, տեղեկացնում է լրատունՙ հաղորդելով, որ «այն հիմնված է տարբեր գիտական աղբյուրների, ինչպես նաեւ գրականության մեջ առկա փաստերի վրա: Աշխատանքը ներառում է անառարկելի փաստեր եւ աղբյուրներ ինչպես օտար, այնպես էլ հայերեն լեզվով»: Ադրբեջանական լրատվամիջոցն ընդգծված լուրջ շարադրում էՙ «Ընթերցողները կնկատեն անվիճելի այն փաստերը, որ հաստատում են անհերքելի այն ճշմարտությունը, թե Լեռնային Ղարաբաղը հնագույն ժամանակներից ի վեր Ադրբեջանի անքակտելի մասն է: Հեղինակն իր աշխատության մեջ ցույց է տալիս, որ հայերը Հարավային Կովկասում են հաստատվել 19- րդ դարից ի վեր: Նա ընդգծում է, որ հայերը Լեռնային Ղարաբաղի պատմության որեւէ ժամանակահատվածում այնտեղ չեն ապրել: Ադրբեջանի պատմական տարածքի մի հատվածիՙ Լեռնային Ղարաբաղի մասին հիմնարար նման աշխատության թուրքերեն հրատարակությունն առանձնահատուկ նշանակություն ունի, քանի որ ընթերցողների ավելի լայն շրջանակի է իրազեկում ԼՂ հակամարտության վերաբերյալ պատմական փաստերին»:
Չգիտեսՙ խնդա՞ս, թե՞ լաս : Այս դեպքում դժբախտաբարՙ վերջինը: Երբ ՀՀ- ից կամ ԼՂՀ- ից գերմաներեն լեզվով ճշմարիտ լուրերը չեն գրոհում ինտերնետային տարածքը, այլընտրանք, ցավոք, չի մնում:
