Երեկ ՀՀ նախագահ Սերժ Սարգսյանը իր նստավայրում հանդիպում ունեցավ Ռամկավար Ազատական կուսակցության ներկայացուցիչների հետ սահմանադրական բարեփոխումների շրջանակներում: Ինչպես տեղեկացնում է նախագահի պաշտոնական կայքը, կուսակցության կողմից հանդիպմանը մասնակցել են Հակոբ Ավետիքյանը, Արմեն Մանվելյանը, Կարեն Կակոյանը, Սուրեն Սարգսյանը, Սեյրան Ղարիբյանը եւ Վարազդատ Ավոյանը: Նախագահ Ս. Սարգսյանի կողքին հանդիպմանը մասնակցել է ՀՀ նախագահին առընթեր սահմանադրական բարեփոխումների մասնագիտական հանձնաժողովի անդամ Վարդան Պողոսյանը:
Ավելի քան 1 ժամ տեւած խորհրդակցությունների ընթացքում ՌԱԿ ներկայացուցիչները հանրապետության նախագահի ուշադրությանն են հանձնել կուսակցության նկատառումներն ու մտահոգությունները քննարկվող նախագծի որոշ կետերի շուրջ, որոնց կապակցությամբ Ս. Սարգսյանը լայն պարզաբանություններ է տվել:
Հանդիպման եզրափակիչ մասում ՌԱԿ ներկայացուցիչները տեղեկություններ են տվել կուսակցության ներկայիս վիճակի եւ առաջիկա անելիքների մասինՙ ՌԱԿ հայաստանյան կառույցի համագումարին ընդառաջ:
