ՌԴ նախագահ Վլադիմիր Պուտինը ՄԱԿ-ում ընդամենը 15 րոպե ուներ համաշխարհային կարեւորագույն խնդիրների առնչությամբ իր երկրի դիրքորոշումը ներկայացնելու համար: Եվ նա հասցրեց այդ կարճ ժամանակահատվածում կոնկրետ առաջարկություններ անել համաշխարհային մարտահրավերների վերաբերյալ: Այդ են վկայում միջազգային լրատվամիջոցների բազմաթիվ արձագանքները:
Ամերիկյան գործարար աշխարհի մալուխային եւ արբանյակային նորությունների CNBC հեռուստաալիքը ընդգծել է Արեւմուտքին Պուտինի ուղղած «Դուք հիմա գոնե հասկանո՞ւմ եք, թե ինչ արեցիք» հարցը: CNBC-ն շեշտում է, որ Պուտինը կշտամբեց մերձավորարեւելյան ժողովրդավարական հեղափոխությունների կազմակերպիչներինՙ նշելով, որ հենց դրանք հանգեցրին «Իսլամական պետություն» ահաբեկչական խմբավորման ստեղծմանը, որի դեմ այժմ աշխարհը ստիպված է պայքարել միացյալ ուժերով:
Ամերիկացի լրագրողներն ուշադրություն են դարձնում նաեւ «Իսլամական պետության» դեմ պայքարելու համար հակահիտլերյան կոալիցիայի օրինակով միջազգային լայն կոալիցիա ստեղծելու ՌԴ նախագահի առաջարկությանը:
Բրիտանական «Թելեգրաֆը» կարեւորում է Պուտինի կոշտ, բայց զուսպ ու բարեկիրթ քննադատությունըՙ ուղղված Արեւմուտքի կառավարություններին, որոնք «սոցիալական գիտափորձեր» են անցկացնում ուրիշ ժողովուրդների վրա: ՌԴ նախագահի խոսքերով, այդ գիտափորձերը մերձավորարեւելյան քաոսի եւ Սիրիայի ու Լիբիայի քաղաքացիական պատերազմների գլխավոր պատճառներն են: Ինչ վերաբերում է «Իսլամական պետության» դեմ պայքարի լայն կոալիցիա ստեղծելու առաջարկությանը, բրիտանական հրատարակության թղթակից Ռոլանդ Օլիֆանտը այն անվանում է արտաքին քաղաքականության «գամբիտ», որը Ռուսաստանին ԱՄՆ-ի մրցակիցն է դարձնում Սիրիայի ճգնաժամի հաղթահարման պայքարում առաջատար լինելու համար:
«Թելեգրաֆը» նշում է, որ Պուտինը ամենքին եւ առաջին հերթին ԱՄՆ-ին պարզ հասկացրեց, որ ինքը մտադիր չէ «հանձնել» Բաշար Ասադին: Ի դեպ, վերջերս շատ է խոսվում նման սցենարի հնարավորության մասին:
«Վաշինգտոն փոստը» նույնպես ուշադրություն է դարձնում այն փաստին, որ Սիրիայի նախագահի ապագայի հարցը դառնում է Պուտինի եւ Օբամայի վճռական տարաձայնության թեմա: Ամերիկյան թերթը կենտրոնանում է Սիրիայի առնչությամբ Ռուսաստանի եւ ԱՄՆ-ի նախագահների կատարած «խորընթաց թռիչքների» վրա:
«Նյու Յորք թայմսը» նշում է, որ Պուտինին հաջողվեց Սիրիայի հարցում խորամանկությամբ գերազանցել Օբամային եւ մեկ քայլ առաջ անցնել: Խոսքը միջազգային հակաահաբեկչական լայն կոալիցիա ստեղծելու եւ այդ հարցը ՄԱԿ-ի ԱԽ-ում քննարկելու առաջարկության մասին է: Միայն պարզ չէ, թե Վաշինգտոնն ինչպես կարձագանքի այդ նախաձեռնությանը, գրում է «Նյու Յորք թայմսը»:
Թերթն արձանագրում է Օբամայի վարչակազմի զարմանքը Սիրիայում ՌԴ գործողությունների եւ տվյալ հարցում Իրաքի ու Իրանի հետ փոխգործողության կապակցությամբ: Սրանով կարելի է բացատրել այն թեժ բանավեճը, թե Նյու Յորքում Պուտին-Օբամա հանդիպումը երկու նախագահներից որ մեկի խնդրանքով կայացավ:
Եվրոպայում, իհարկե, առանձնակի ուշադրություն դարձրին ՌԴ նախագահի այն խայթիչ դիտողությանը, թե ինչու ՆԱՏՕ-ն դեպի արեւելք է ընդլայնվում անցյալում իրեն դիմակայած Վարշավյան դաշինքի բացակայության պայմաններում: Գերմանական «Շպիգել» շաբաթահանդեսը համեմատում է Ռուսաստանի եւ ԱՄՆ-ի նախագահների ելույթները եւ դրանք նույնիսկ մենամարտ է անվանում:
Գերմանական հեղինակավոր հրատարակությունը նշում է, որ ՌԴ նախագահն ուզում է Ռուսաստանին վերադարձնել իր սովորական տեղը համաշխարհային ընկերակցությունում, որպեսզի երկիրը կարողանա մարտահրավեր նետել Վաշինգտոնին:
«Շպիգելի» կարծիքով, Օբաման ի սկզբանե հայտնվեց պարտվողի վիճակում եւ այն էլ ավելի խորացրեց ՄԱԿ-ում իր ելույթի ժամանակՙ քանիցս ուղղակիորեն մեղադրելով Մոսկվային: Հրատարակությունը նրա ելույթը համարում է չափից ավելի հուզական:
Նման ուղղագիծ հարձակումների ֆոնի վրա Արեւմուտքի հասցեին Վլադիմիր Պուտինի արած բավական կոշտ քննադատությունն իր ձեւով շատ ավելի զուսպ էր թվում: ՌԴ նախագահը ոչ մի անգամ չհիշատակեց իր ընդդիմախոսների անունները, թեեւ հասկանալի էր, թե ում մասին է խոսքը», նշում է գերմանական հանդեսը:
Շվեդական «Աֆտոնբլադետ» թերթը համաձայն է «Շպիգելի» հետ: Շվեդները նույնպես համեմատում են Պուտինի եւ Օբամայի ելույթները եւ նրանց մենամարտն անվանում են քաղաքական ծանրքաշայինների մարտ: Ստոկհոլմյան հրատարակությունը ուշադրությունը բեւեռում է ԱՄՆ-ին եւ Արեւմտյան Եվրոպային Պուտինի հասցեագրած այն մեղադրանքի վրա, որ նրանց աշխարհաքաղաքական հավակնությունները հանգեցրին Մերձավոր Արեւելքի ներկայիս քաոսային վիճակին:
Բրիտանական «Ֆայնենշլ թայմս» թերթը նշում է, որ Վլադիմիր Պուտինը «փոխեց նկարագիրը» եւ վտարակից վերածվեց «գորշ կարդինալի»: Թերթի վերլուծաբանները նաեւ վստահ են, որ ՄԱԿ-ում Պուտինը կատարեց լուրջ դիվանագիտական քայլ: Նրանք նշում են, որ այդ քայլի էությունը օգնության հատկացումն է եւ նույնիսկ առաջատար դերի ստանձնումն է «Իսլամական պետության» դեմ մղվող պայքարում, ինչը Ռուսաստանին վերստին միջազգային ասպարեզ կհանի «գլխավոր դերում»:
