Շոլցը շեշտել է Ղարաբաղի ժողովրդի ինքնորոշման իրավունքի կարևորությունը․ այդ դեպքում Արցախի կարգավիճակի նշաձողն ինչո՞ւ իջեցնել

Գերմանիայի կանցլերը կարևորում է Լեռնային Ղարաբաղի ժողովրդի ինքնորոշման իրավունքը: Բեռլինում Հայաստանի վարչապետ Փաշինյանի հետ բանակցությունների ավարտին խոսելով հայ – ադրբեջանական կարգավորումից՝ Օլաֆ Շոլցը երկու անգամ շեշտեց՝ ինչպես տարածքային ամբողջականության, այնպես էլ ինքնորոշման իրավունքը հավասարազոր են։

«Մենք մտահոգված ենք Հայաստանի և Ադրբեջանի սահմանին անկայուն և Լեռնային Ղարաբաղում գնալով սրվող հումանիտար իրավիճակից: Ստատուս քվոն չի կարող երկար շարունակվել, պետք է հանգել երկարաժամկետ, ի բարօրություն մարդկանց լուծման։ Անհրաժեշտ է հասնել խաղաղ հանգուցալուծման՝ Հայաստանի և Ադրբեջանի տարածքային ամբողջականության, ինչպես նաև Լեռնային Ղարաբաղի քաղաքացիների ինքնորոշման տեսանկյունից։ Ընդ որում, այս բոլոր սկզբունքները հավասարազոր են», – հայտարարեց կանցլերը:

Եթե Գերմանիայի կանցլերն էլ է շեշտում, որ Արցախի ժողովրդի ինքնորոշման իրավունքը պետք է հաշվի առնվի, ապա ի՞նչ հեքիաթներ են պատմել մինչև հիմա ՀՀ իշխանությունները, թե իբր միջազգային հանրությունը պահանջում է, որ Հայաստանն Արցախի կարգավիճակի նշաձողն իջեցնի։

Փաստորեն, Շոլցը հրապարակավ հերքեց Փաշինյանի՝ մեկ տարի առաջվա հայտարարությունը, որը վերաբերում էր նաև Գերմանիային՝ որպես միջազգային հանրության մաս։