Բեռնի «Շվեյցարիա-Հայաստան ընկերակցությունից» ստացված հաղորդագրությունը տեղեկացնում է, որ մարդու իրավունքների եվրոպական դատարանի վերին պալատը վերահաստատել է դատարանի նախկին (դեկտեմբեր 17, 2013 թ.) որոշումը «Փերինչեքն ընդդեմ Շվեյցարիայի» գործում եւ փաստորեն արդարացրել Փերինչեքին:
«Շվեյցարիա-Հայաստան ընկերակցությունը» խորապես ցնցված է այս դատավճռով, որն արձակվում է Հայոց ցեղասպանության հարյուրամյակի հիշատակությունների տարում: Ներկա դատավճիռը մարտահրավեր է նետում Շվեյցարիայի դատարանի որոշմանը, որը դատապարտել էր Փերինչեքին Ցեղասպանության փաստը ժխտելու համար, եւ հարված հասցնում Վատիկանում Հռոմի պապի հնչեցրած ցեղասպանության ճանաչման համընդհանուր հոգեւոր մթնոլորտին: Հայոց ցեղասպանությունը պատմական փաստ է եւ չի կարող հարցականի տակ դրվել», ասված է հաղորդագրության մեջ, որը նաեւ նշում է, որ Թուրքիան էր, որ սկզբից որոշեց Փերինչեքին օգտագործել փորձարկելու իր ժխտողական քաղաքականությունը այլ երկրներում:
