Սիդնեյում բնակվող Սասուն Գրիգորյանը հետաքրքրական ձեւով է դրամահավաք կազմակերպել հօգուտ սիրիահայ երեխաների: Սիդնեյում հրատարակվող «Միութիւն» ամսագրից տեղեկանում ենք, որ նա մի փոքրիկ խումբ կազմած ձեռնամուխ է եղել բարեգործական առաքելությամբ Արարատ լեռը բարձրանալ հարգանքի տուրք մատուցելու նախ Ցեղասպանության դարադարձին եւ ապա Լիբանանում Ավստրալիայի կառավարության կողմից բացված որբանոցին, որը գործել է մինչեւ 1930-ական թվականները:
Կանբերայում գործող «Նյու Սաութ Ուեյլզ» համալսարանի պատմաբան Փիթեր Ստենլին խորհրդանշական երեւույթ է տեսել այդ յուրօրինակ ուխտագնացության եւ որբանոցի կայացման մեջ: «Դա ցույց է տալիս Ավստրալիայի եւ Հայաստանի միջեւ գոյություն ունեցող սերտ կապը: Այդ ժամանակ տարբեր եկեղեցական հարանվանություններ (Ավետարանչական, Կաթոլիկ, Անգլիկան, եւ այլն) մասնակցեցին Ազգերի լիգայի օգնության միջոցառումներին: Դրանցում շատ տարբեր մասնագիտությունների տեր մարդիկ էին ներգրավված: Էդիթ Գլենվիլ անունով մի կին, որ որդի էր կորցրել Գալիպոլիում, որոշել էր օգնել հայերին: Մյուս մասնակիցներից կարելի է հիշել Ջեսսի Ուեբին եւ Իզաբել Հոտանին, որոնք մեծապես նպաստեցին որբանոցի համար հանգանակություն կատարելու գործին», ասել է նա:
Սասուն Գրիգորյանն իր հերթին շնորհակալություն հայտնելով ավստրալացիներին, նշել է, որ պատեհ առիթ է, որ հայերի ներկա սերունդը տեղեկանա որոշ մանրամասների, որոնք կապված են Հայոց ցեղասպանության հետ:
