Ուրուգվայի նախկին նախագահ Խոսե Մուխիկան, որը աշխարհում հայտնի է, որպես «ամենաաղքատ նախագահ», օրերս այցելել էր Թուրքիա: Տեղի` Ահմեդ Ադնան Սալգունի անվան մշակութային կենտրոնում Մուխիկան պատասխանել է լրագրողների որոշ հարցերի, որոնցից մեկը վերաբերել է նրան, թե ինչո՞ւ է Ուրուգվայի նախկին նախագահը հրաժարվել Նոբելյան Խաղաղության մրցանակից. «Այս աշխարհում, որտեղ այսքան պատերազմներ կան, ի՞նչ երեսով են Խաղաղության Նոբելյան մրցանակ շնորհում», ասել է Մուխիկան:
Լրագրողներից մեկն էլ խնդրել է, որ Մուխիկան որոշ խորհուրդներ տա աղքատներին: Ուրուգվայի նախկին նախագահն ասել է. «Պետք է սովորել մեկ պայուսակով ապրել: Մյուս կողմից, երբ ինչ-որ բան ես գնում, իրականում դրամով չես գնում: Այդ փողը վաստակելու համար ձեր ժամանակն եք հատկացնում եւ այդ ժամանակով եք գնում: Եթե դուք բախտավոր եք` ունեք ժամանակ, իրական հարստությունը դա՛ է: Դուք կարող եք իրեր գնել, սակայն չեք կարող իրական կյանքում ժամանակ գնել: Սուպերմարկետ գնալով` կարո՞ղ եք ասել` ինձ հինգ տարի հետ տվեք, չե՛ք կարող»:
Իրականում, կարող ենք, ավելին, Ուրուգվայի հարգարժան նախկին նախագահը հավանաբար չգիտի, որ հայկական սուպերմարկետներում ամեն ինչ կա, անգամ` Նոբելյան Խաղաղության մրցանակ` մի քանի հատ, տարբեր գույների եւ քաշի:
