ՀԱՅ ՕԴԱՉՈՒՆԵՐԻ ԱՃՅՈՒՆՆԵՐԻ ՀԱՅԱՍՏԱՆ ՏԵՂԱՓՈԽՄԱՆ ՀԱՐՑՈՒՄ ԿԱՋԱԿՑԻ ՌՈՒՍԱԿԱՆ ԴԵՍՊԱՆԱՏՈՒՆԸ

Հայաստանի ԱԳՆ-ն դիմել է Ռուսաստանի ԱԳՆ-ին` ակնկալելով Ուգանդայում եւ համատեղության կարգով Սուդանում ՌԴ դեսպանության (նստավայրն Ուգանդա) աջակցությունը` Հարավային Սուդանում վթարի ենթարկված բեռնատար ինքնաթիռի անձնակազմի անդամների աճյունների տեղափոխման գործում: Հիշեցնենք, որ նոյեմբերի 4-ին Հարավային Սուդանում, մայրաքաղաք Ջուբայի օդանավակայանից մեկ մղոն հեռավորության վրա, կործանվել էր Asis Airways տաջիկական ընկերության կողմից շահագործվող ԱՆ-12 ինքնաթիռը, որի անձնակազմի անդամները հայեր էին: Ավիավթարի հետեւանքով զոհվել է 41 մարդ, այդ թվում անձնակազմի 5 հայ (ՀՀ քաղաքացիներ) եւ մեկ ռուս օդաչուները, ուղեւորները եւ ցամաքում գտնվող 10 մարդ: Փրկվել է մեկ երեխա, որին մայրը հուսահատ քայլով ինքնաթիռի գետնին բախվելու պահից վայրկյան առաջ դուրս է նետել: Ինքնաթիռը բեռնատար է եղել, այնտեղ կարող էին գտնվել12 ուղեւոր: Ենթադրություններ կան, որ ինքնաթիռում կարող էին լինել նախատեսված 12 ուղեւորից ավելի մարդ, զոհվածների մեծ թիվն այդ ենթադրության հետ է կապված: