Ռ. ԱՎԱՆԵՍՅԱՆ, Մոսկվա
Փետրվարի 16-ին եւ 17-ին Մոսկվայի Զամոսկվորեչյան դատարանում շարունակվել է ճանաչված գործարար եւ բարեգործ Լեւոն Հայրապետյանի նկատմամբ խարդախության հատկանիշներով հարուցված քրեական գործի քննությունը: Հիշեցնենք, որ իրավապահները Հայրապետյանին ակնհայտորեն շինծու մեղադրանքներ են առաջադրել առանձնակի ծանր հանցագործությունների համար ցմահ ազատազրկման դատապարտված Բաշկիրիայի նախկին սենատոր Իգոր Իզմեստեւի մոր հայտարարության հիման վրա. կինը գործարարին մեղադրում է իրենից 700 հազար դոլար յուրացնելու մեջ, իբրեւ թե տղայի հանցանքը մեղմացնելու միջնորդության համար: Լեւոն Հայրապետյանը, ինչպես արդեն տեղեկացրել ենք, սկզբից եւեթ այդ կնոջ ցուցմունքները համարել է պատվեր եւ իր հասցեին արված զրպարտություն, նա իր մեղքը չի ընդունում եւ դատարանում մի քանի անգամ հերքել է 700 հազար դոլար հափշտակելու մասին մեղադրանքները: Իսկ Հայրապետյանի շահերի պաշտպանըՙ Մոսկվայի փաստաբանական պալատի փաստաբան, ՌԴ-ում ճանաչված իրավաբան Դավիթ Խեչյանը, ով մանրամասն ուսումնասիրելով քրեական գործի նյութերըՙ մի շարք աղաղակող փաստեր է ջրի երես հանել եւ ներկայացրել դատարանին:
Ըստ մոսկովյան «Սոբեսեդնիկի» հավաստի տեղեկություններիՙ այս շաբաթ ընթացած դատաքննությունների ընթացքում առավել քան աղմկահարույց եւ սենսացիոն տեղեկություններ են ի հայտ եկել: Նախ, լուրեր են շրջանառվում այն մասին, որ Իզմեստեւի տխրահռչակ փաստաբան Սերգեյ Անտոնովը, որը ներկայումս ՌԴ իրավապահների կողմից գտնվում է հետախուզման մեջ, 2010 թվականին ինքնագլուխ, խաբեության եւ վստահության չարաշահման ճանապարհով, մոլորության մեջ Է գցել Իգոր Իզմեստեւի մորը, խոստումներ տվել, իբրեւ թե «վերեւներում» մեծ կապեր ունեցող Հայրապետյանը դրամական խոշոր վարձատրության դիմաց կարող է հասնել նրա որդու նկատմամբ ավելի մեղմ դատավճռի կայացմանը: Սերգեյ Անտոնովը, ըստ վկայությունների, միայնակ ստացել է 700 հազար դոլարը: Բայց դա դեռ ամենը չէ: Այդ ժամանակահատվածում նա տարբեր քրեական գործերի համար արդարացման կամ մեղմացուցիչ վճիռներ ապահովելու նպատակով տարբեր անձանցից նույնպես խաբեության համանման եղանակներով այլ խոշոր գումարներ էլ է վերցրել, որից հետո դիմել է փախուստի եւ ըստ որոշ տեղեկություններիՙ ներկայումս գտնվում է ԱՄՆ-ում:
Այսպիսով, այն հիմնավոր պնդումները, թե Լեւոն Հայրապետյանը հարյուր տոկոսով անմեղ է եւ նրա ձերբակալությունը նման է ապաշնորհ ձեւով կառուցված անողնաշար ու խարխուլ պատվերի եւ քաղաքական հաշվեհարդարիՙ դատաքննությունից դատաքննություն ավելի ու ավելի է որոշակիանում:
Փետրվարի 16-ին դատարան ներկայացավ եւ վկայություն տվեց ցմահ դատապարտվածիՙ նախկին սենատոր Իգոր Իզմեստեւի հայրը, որը ընտանեկան ինչ-ինչ պատճառներով բաժանվել էր կնոջից: Դատավորի այն հարցին, թե ո՞ւմ են տվել խնդրո առարկա գումարըՙ տղամարդը առանց երկմտելու եւ անվարան պատասխանեցՙ իրենց նախկին փաստաբան Անտոնովին: Հարցը այլ կերպ կրկնեցինՙ գումարը Հայրապետյանի՞ն եք տվել: Իզմեստեւի հոր պատասխանը հետեւյալն էր. «Ոչ, կինս տվել է փաստաբան Անտոնովին»:
Հայրը նաեւ նշեց, որ ինքը Հայրապետյանին առաջին անգամ է դեմառդեմ հանդիպում, մինչ այդ իրեն երբեւէ չեն տեսել, միշտ գործ են ունեցել որդու փաստաբան Անտոնովի հետ, որն ամեն անգամ սուտ խոստումներով կերակրել է իրենց ու խաբել, եւ ըստ իրենց ունեցած տեղեկություններիՙ նա շատերից է փող վերցրել ու փախել:
Այս շաբաթ տեղի ունեցած դատաքննության ընթացքում մի արտառոց իրավիճակ էլ արձանագրվեց դատարանում: Ներկաներից մեկի այն հարցին, թե ինչո՞ւ չեն ձայնագրվում դատական նիստի ցուցմունքներն ու ելույթները, դատավորը պատճառաբանեց, թե սարքավորումը խափանվել է, եւ քիչ անց սկսեցին այդ գործն անել «տնայնագործական» եղանակովՙ հեռախոսով ձայնագրելով…
Եվ այսպես, մոսկովյան դատական շաբաթն անցավ ահա այսպիսի խայտառակ ու ամոթալի «ձեռքբերումներով», ինչը, անկեղծ ասած, ստվեր է գցում արդարադատության մասին ողջախոհ մարդկանց ունեցած պատկերացումներին եւ փլուզվում է հավատը:
Իսկ Լեւոն Հայրապետյանին դատարան էին տեղափոխել հիվանդանոցից եւ նիստերն ավարտվելուն պես կրկին տեղափոխեցին հիվանդանոց:
Մնում է զինվել համբերությամբ եւ սպասել այս ակնհայտ խեղկատակության ավարտին:
Նրան եւ նրա անմեղությանը չկասկածող մարդկանց մեծ համբերություն ենք ցանկանում:
Հաջորդ նիստը նշանակված է փետրվարի 24-ին:
