«Մալաթիա» տոնավաճառի փակման հարցում պետության դիրքորոշումը հակասում է ազատ շուկային. տնտեսագետ

Մալաթիայի տոնավաճառի փակման գործում բազմաթիվ անհայտներ կան. առաջին խնդիրն այն է՝ արդյոք տոնավաճառի տարածքն օտարվելու է, տրվելու է որևէ մեկին կամ որևէ բիզնեսի, Azg.am-ի թղթակցի հետ զրույցում ասաց տնտեսագետ Հրանտ Միքայելյանը՝ անդրադառնալով այսօրվանից տոնավաճառի փակ լինելու թեմային։

«Մալաթիայի տոնավաճառը շատ մեծ տարածք է զբաղեցնում, և հենց առաջին հարցն այն է, թե ի՞նչ է այդ տարածքի հետ արվելու, ո՞ւմ է այն ապագայում պատկանելու։ «Սուրամալու»-ի տոնավաճառի դեպքում տեսանք, որ շուկայի մեծ մասը սեփականշնորհվել կամ գնվել է ՔՊ-ական պատգամավոր Խաչատուր Սուքիասյանի կողմից, ում էլ կասկածում են ամիսներ առաջ շուկայում տեղի ունեցած հրդեհի մեջ»,- ասաց մեր զրուցակիցը։

Երկրորդ կարևոր հանգամանքն, ըստ տնտեսագետի, այն է, թե ի՞նչ է լինելու Մալաթիայի շուկայի տարածքում՝ կառուցվելու է առևտրի կամզակերպման այլ քաղաքակիրթ օբյե՞կտ, թե բնակելի շենքեր են բարձրանալու։

«Արդյոք տոնավաճառի աշխատակիցների համար աշխատանքային նոր տեղեր են ստեղծվելու, թե պարզապես նրանց աշխատատեղերը կրճատվելու են։ Սա շատ կարևոր է՝ հասկանալու, թե իրականում ինչ է տեղի ունենում։

Այն, որ տոնավաճառներն ամեն տեսանկյունից զիջում են ժամանակակից առևտրի օբյեկտներին, փաստ է, սակայն մյուս կողմից հարց է ծագում՝ որքանո՞վ է ճիշտ, որ պետությունը ներգրավվի փակման գործընթացում»,- հարց հնչեցրեց Հրանտ Միքայելյանը։

Տնտեսագետը նկատեց՝ Մալաթիայի տոնավաճառը փակելու փոխարեն պետությունը կարող էր մաքրության և անվտանգության հստակ չափորոշիչներ սահմանել՝ մանր և միջին տնտեսվարողներին թույլ տալով շարունակել աշխատել։

«Եթե իսկապես անվտանգության հետ կապված ռիսկեր կային, կարելի էր դրանք վերացնել, և առևտրականները շարունակեին աշխատել։

Եթե Մալաթիայի տոնավաճառն այսքան տարի աշխատում է, մարդիկ այնտեղից գնումներ են կատարում, ուրեմն երկկողմանի ձեռնտու է։ Եթե ձեռնտու չլիներ, այն ինքնին փակվելու էր։ Ի՞նչ իմաստ ուներ, որ պետությունը միանգամից ներգրավվեր. սա ազատ շուկային հակասող գործողություն է։

Այսինքն՝ կամ առկա է գերակա պետական շահ, կամ առկա է մասնավոր շահ, որն ազդում է պետության որոշումների վրա։ Շատ դեպքերում հենց այդպես էլ լինում է»,- ամփոփեց տնտեսագետը։

Հիշեցնենք, որ Քաղաքաշինության, տեխնիկական և հրդեհային անվտանգության տեսչական մարմնի ղեկավարի որոշմամբ հակահրդեհային կանոնների խախտման պատճառով «Մալաթիա» տոնավաճառը փետրվարի 1-ից փակ է: Որոշումն առաջացրել է տոնավաճառի՝ ավելի քան 600 աշխատակիցների դժգոհությունը։