Ապրիլի 19-ին Հաագայում, Համագործակցող հոլանդահայ կազմակերպությունների պատվիրակությունը հանրագիր է հանձնել Նիդերլանդների խորհրդարանի արտաքին հարաբերությունների մշտական հանձնաժողովի նախագահ տիկին Անջելին Էյսինկին:
Հայկական կազմակերպությունների ներկայացուցիչները (Հոլանդահայ կազմակերպությունների ֆեդերացիա (FAON), Հայ դատի հանձնախումբ, Հայ երիտասարդական «AJO» կազմակերպություն, Հայ ուսանողական «Գլաձոր» եւ Հայ երիտասարդական «Գարեգին Նժդեհ» միություններ ) ներկայացրեցին հանրագրի տարբեր պահանջները` Նիդերլանդների կառավարության կողմից Հայոց ցեղասպանության լիարժեք ճանաչում եւ Ռաուֆուտի բանաձեւի դրույթների իրականացում, թուրքական եւ ադրբեջանական կազմակերպությունների ներկայացուցիչներիՙ հայերի հանդեպ խտրականություն եւ ատելություն սերմանող արտահայտությունների դատապարտում , հոլանդական քաղաքական եւ հասարակական կյանքում Անկարայի թաքուն միջամտության դեմ պայքարի անհրաժեշտություն: Առաջ քաշվեց նաեւ Հայոց ցեղասպանության հետեւանքով հայերի կորուստների անհատական, համայնքային եւ համազգային իրավունքների եւ օրինական շահերի վերականգնման հարցը, ինչպես նշված է Հայոց ցեղասպանության 100-րդ տարելիցի համահայկական հռչակագրում:
Առաջիկա շաբաթ օրը ՙ ապրիլի 23-ին, Համագործակցող հոլանդահայ կազմակերպությունները հանրահավաք – ցույց կանցկացնեն Ամստերդամի կենտրոնում Հայոց ցեղասպանության 101-րդ տարելիցի կապակցությամբ:
Ապրիլի 24-ին կկայանան ոգեկոչման միջոցառումներ Նիդերլանդների հայկական հուշարձանների մոտ, հաղորդում է տեղի «Աբովյան» մշակութային միությունը:
