ՀՀ ԳԱԱ «Հայկենսատեխնոլոգիա» գիտաարտադրական կենտրոնի գիտնականները մշակել են «Rhizomix» կենսապարարտանյութը, որը նպաստում է գետնանուշի բերքատվության բարձրացմանը:
«Rhizomix» համալիր կենսապարարտանյութը մշակվել է սիմբիոտիկ եւ ազատ ապրող ազոտֆիքսող բակտերիաների հիման վրա: Այն նախատեսված է արժեքավոր հատիկաընդեղենային եւ կերային գյուղատնտեսական մշակաբույսերի սոյայի, լոբու, սիսեռի, ոլոռի, գետնանուշի, ոսպի, երեքնուկի, կորնգանի, առվույտի բերքատվության բարձրացման համար Պատրաստուկի բաղադրության մեջ ռիզոբակտերիաների համակցությունները, կախված հատիկաընդեղեն բույսի տեսակից, զգալիորեն մեծացնում են բույսերի մատակարարումն ազոտով եւ ֆոսֆորով:
Արդյունքում բարձրանում է բերքատվությունը միջինում 20-ից մինչեւ 60 տոկոս: Գիտնականների կողմից առաջադրված վարկածը Bradyrhizobium arachidis-ի եւ Bradyrhizobium japonicum-ի բարեկամ շտամների հնարավոր խաչաձեւ սիներգետիկ ազդեցության մասին՝ հաստատվել է գետնանուշ բույսի օրինակով:
Ստացված տվյալների համաձայն, Barachidis-ի բոլոր փորձարկված շտամները «Rhizomix» պարարտանյութի բաղադրության մեջ B. japonicum MDC 5784-ի հետ միասին նպաստում են գետնանուշի կենսաչափական ցուցանիշների բարելավմանը: Արդյունքում գետնանուշի բերքատվությունը համեմատած ստուգիչ բույսերի հետ՝ բարձրացել է 23,3-ից մինչեւ 34,5 տոկոս B. arachidis-ի փորձարարական շտամներով սերմերի նախացանքսային եւ հետցանքսային մշակումը նպաստել է պալարների, պատիճների սերմերի քանակի եւ քաշի զգալի աճին եւ կենսազանգվածի ավելացմանը: Համեմատական վերլուծությունը ցույց է տվել, որ գետնանուշի ամենաակտիվ սիմբիոնտը B. arachidis MDC 5806 շտամն է, որը բարձրացրել է բույսերի բերքատվությունը 34,5 տոկոսով:Գետնանուշը Հայաստանում մշակության համար հեռանկարային ընդեղեն բույսերից է Այն արժեքավոր արտադրական, գյուղատնտեսական յուղատու մշակաբույս է: Գետնանուշի հատիկները ծառայում են որպես հումք չչորացող բուսական յուղի արտադրության համար, որն օգտագործվում է պահածոների, հրուշակեղենի եւ մարգարինի պատրաստման համար
ՍՏԵՓԱՆ ՊԱՊԻԿՅԱՆ
