Արտյոմ Հակոբյանը նշանակվել է սպորտի եւ երիտասարդության հարցերի նախարարի խորհրդական եւ աշխատելու է անվճար հիմունքներով: Չնայած տարբեր նախագծերից, որոնք լինելու են եւ շատ են լինելու, ստանալու է հոնորարներ:
Այս մասին պարզ դարձավ երեկ: Իսկ ավելի վաղ Արտյոմ Հակոբյանը Ֆեյսբուքի իր պատին գրել էր, որ ինքը մեկ րոպե անգամ չի ցանկանում մնալ Հայաստանում, եւ որ ինքը չի ցանկանում, որ իր երեխաները մեծանան էս երկրում, քանի որ էստեղ ոհմակը կաթիլ-կաթիլ խմում է մեր արյունը, ու ժողովրդի մեծ մասն էլ արդեն վամպիր է դարձել, քանի որ ոհմակը կծել-վարակել է, իսկ քաղաքական գործիչները չեն հանգստանում, եթե քֆուր չեն տալիս:
Կառավարության «ստվերային»ՙ «Մի զզվիր, խորհուրդ տուր» ծրագրի շրջանակներում Հակոբյանը նշանակվել է նախարարի խորհրդական եւ այսուհետ ոչ թե զզվելու է, այլ խորհուրդ է տալու: Այս կապակցությամբ հատկապես մարզերի մեր բնակիչները շարժվում են դեպի Երեւան, որի Ազատության հրապարակում պատրաստվում են հայտնել իրենց հրապարակային զզվանքը:
