Միացյալ Նահանգների եւ Կանադայի Թեքեյան Մշակութային միության Կենտրոնական վարչությունն իր ամենատարբեր ծրագրերով շարունակում է աջակցություն ցուցաբերել Արցախին: Ամանորյա տոնական օրերին Կենտրոնական վարչությունը Հայաստանյան ներկայացուցչության գրասենյակի միջոցով կարողացավ իրագործել Արցախի Հանրապետության աջակցության եւս մի ծրագիր. որոշում ընդունվեց դրամական օգնություն տրամադրել 2020 թվականի 44-օրյա պատերազմում զոհված՝ կրթության, սպորտի եւ մշակույթի ոլորտի կարիքավոր ընտանիքներին:
Արցախի Հանրապետության նախագահի խորհրդական, Սփյուռքի հարցերով հատուկ հանձնարարությունների գծով ներկայացուցիչ Ազատուհի Սիմոնյանի տրամադրած տվյալների համաձայն, 103 ընտանիք արդեն իսկ ստացել է աջակցությունը. նրանք տեղահանվել են Շուշիի եւ Քաշաթաղի շրջաններից, գործազուրկ են եւ բնակվում են Արցախում:
Հավելենք, որ ԹՄՄ Սփյուռքի կառույցներում եւ մեր հայրենակիցների շրջանում այս նախաձեռնությունը ոգեւորությամբ ընդունվեց եւ շատերը ինքնաբուխ կերպով մինչ օրս արձագանքում եւ մասնակցում են դրամահավաքին:
Լիահույս ենք , որ ԱՄՆ եւ Կանադա ԹՄՄ-ի կողմից նախաձեռնված այս ծրագիրը կլինի շարունակական:ԱՄՆ եւ Կանադա ԹՄՄ
Հայաստանյան Ներկայացուցչության գրասենյակ
2023 թվական, հունվար 19
