Ֆրանսիայի հանրային առողջապահության կառույցները հայտնում են, որ ռեկորդային շոգի ալիքները հունիսի 24-ից ի վեր երկրում մոտ 1000 հոգու մահվան պատճառ են դարձել։
Իրավիճակն առավել լուրջ է այն շրջաններում, որտեղ բարձր ջերմաստիճանի պատճառով հայտարարվել է ամենաբարձր տագնապի մակարդակ: Տնային մահացությունների հատկապես կտրուկ աճ է նկատվել Իլ դը Ֆրանս շրջանում, որը ներառում է Փարիզը և նրա շրջակա տարածքները:
Պաշտոնյաները նշել են, որ հրապարակված թվերը վերջնական չեն, և մահացությունների թվի հետագա աճը չի կարելի բացառել ծերանոցներից տվյալներ ստանալուց հետո։
Մի քանի օր տևած ռեկորդային շոգից հետո կիրակի օրը Ֆրանսիայի մեծ մասում ջերմաստիճանը փոքր-ինչ նվազել է, սակայն երկրի հյուսիս-արևելքում ուժի մեջ են մնում շոգի մասին նախազգուշացումները։
Ֆրանսիայի առողջապահության նախարար Ստեֆանի Ռիստը հայտարարել է, որ շոգի ազդեցությունը հանրության առողջության կարող է շարունակվել ևս 7-10 օր՝ ջերմաստիճանի նորմալացմանը վերադառնալուց հետո։
Գիտնականները կարծում են, որ նման ծայրահեղ ջերմային ալիքների հաճախականությունն ու ինտենսիվությունն աճում են կլիմայի փոփոխության պատճառով: Վերջին շաբաթներին Եվրոպայի շատ երկրներում ջերմաստիճանի ռեկորդներ են սահմանվել, ինչը լուրջ մարտահրավերներ է ստեղծել տրանսպորտային, էներգետիկ և առողջապահական համակարգերի համար:
