Հայ-ադրբեջանական շփման գծում դիտորդական խումբ է աշխատում։
Հունվարի 13-ին, Երեւանում ՀՀ ԱԺ նախագահ Ալեն Սիմոնյանի հետ համատեղ ասուլիսում Ֆրանսիայի Ազգային ժողովի նախագահ Յաել Բրաուն-Պիվենը հույս հայտնեց, որ իրենք ևս մեկ անգամ կդիմեն Եվրոպային՝ ևս մեկ դիտորդական խումբ տեղակայելու հայ-ադրբեջանական շփման գծում։
«Ֆրանսիան պաշտպանում է այս դիրքորոշումը, բայց անհրաժեշտ է, որ յուրաքանչյուր անդամ-պետություն համաձայն լինի այդ դիրքորոշման հետ:
Ինչ վերաբերում է փաստահավաք առաքելությանը, ես չգիտեմ՝ ՀՀ իշխանությունների կողմից նման դիմում եղե՞լ է: Ուկրաինայի դիմումներին Ֆրանսիան պատասխանել է՝ ուղարկելով մի շարք փորձագետների: Չգիտեմ՝ արդյոք Հայաստանը նման դիմում ուղղե՞լ է Եվրոպային կամ Ֆրանսիային, ուստի չեմ կարող պատասխանել», – նկատեց Ֆրանսիայի ԱԺ նախագահը։
Սեպտեմբերյան ագրեսիայից հետո, երբ Հայաստանի սահմանից ներս առաջացավ հայ-ադրբեջանական շփման գիծ ու փաստահավաք առաքելությունների անհրաժեշտություն, դրան ավելացավ նաև Բերձորի միջանցքի խնդիրը։ Արդեն մեկ ամիս դիտորդական առաքելության կարիք կա նաև Բերձորի միջանցքում։
Այս հարցին Ալեն Սիմոնյանը պատասխանեց.
«Եթե չեմ սխալվում, դրա համար պետք է նաև Ադրբեջանի համաձայնությունը, պետք է բոլոր կողմերի համաձայնությունը»։
Հարցին, թե Ֆրանսիան ռազմական աջակցություն կարո՞ղ է ցուցաբերել Հայաստանին, Ֆրանսիայի ԱԺ նախագահն արձագանքեց. «Ես ԱԺ նախագահ եմ, ոչ վարչապետ եմ, ոչ երկրի նախագահ եմ, ուստի չեմ կարող այդ հարցին պատասխանել»:
