Շոտլանդիայի կառավարության ղեկավար Նիկոլաս Ստերզենը Մեծ Բրիտանիայի վարչապետ Թերեզա Մեյին երկամսյա վերջնագիր է ներկայացրել Brexit-ը գործնականում սկսելու հարցի առնչությամբ: Այդ մասին հաղորդում է «Ինդիփենդենտ» թերթը: Ստերջենը հայտարարել է Brexit-ի հետ կապված «տեղաշարժի» անհրաժեշտության մասին, նշելով, որ հակառակ դեպքում «չի ուշանա» Շոտլանդիայի անկախության հանրաքվեն, որը կարող է «սառեցնել» Brexit-ը:
Ստերջենը ընդգծել է, որ «փոխզիջում գտնելու փորձեր առայժմ կատարել է միայն Շոտլանդիայի կառավարությունը»: Մեծ Բրիտանիայի Գերագույն դատարանը հունվարի 24-ին որոշում ընդունեց ԵՄ-ից դուրս գալը սկսելու գործընթացի խորհրդարանական հաստատման մասին: Դատարանը վճռեց, որ տվյալ արարողակարգը սկսելու համար Շոտլանդիայի, Հյուսիսային Իռլանդիայի եւ Ուելսի խորհրդարանների համաձայնությունը չի պահանջվում: Դրանից հետո ընդդիմադիր Լեյբորիստական եւ Շոտլանդիայի Ազգային կուսակցությունների ներկայացուցիչները հանդես եկան Brexit-ին վերաբերող օրինագծում փոփոխությունների կատարման օգտին: Վերջնական քվեարկությունը տեղի կունենա փետրվարի 8-ին: Շոտլանդիայի իշխանությունները մասնավորապես պահանջում են, որ Մեծ Բրիտանիան մնա Եվրոմիության հետ ընդհանուր շուկայի կազմում, մինչդեռ Թերեզա Մեյը հայտարարել է, թե դա անհնար է:
Ի տարբերություն ամբողջ Մեծ Բրիտանիայի, հունիսի 23-ի հանրաքվեի ժամանակ Շոտլանդիան քվեարկել էր ԵՄ անդամության պահպանման օգտին:
