Իշխող «Քաղաքացիական պայմանագիր» կուսակցության վարչության նիստից հետո, երբ պարզ դարձավ, որ վարչության կազմն անճշտություններով է ընտրվել, կրքերը չեն հանդարտվում: «Ժողովուրդ» օրաթերթն էր գրել, որ ՔՊ-ի վարչության կազմի ձեւավորումն իշխանականների ներսում դժգոհություններ է առաջացրել: Ազգային ժողովի համանուն խմբակցության պատգամավորների կողմից վերահաշվարկ պահանջելուց հետո, պատկերն իսկապես փոխվել էր, ու նախկին ԼՀԿ-ական Հայկ Կոնջորյանին եւ փոխվարչապետ Համբարձում Մաթեւոսյանին փոխարինելու են եկել ԱԺ «Քաղաքացիական պայմանագիր» խմբակցության պատգամավոր Արսեն Թորոսյանն ու արտակարգ իրավիճակների նախարար Արմեն Փամբուխյանը:
«Ազգ»ը տեղեկացավ, որ վարչապետ Նիկոլ Փաշինյանի՝ օրերս խորհրդարանում ՔՊ-ականների հետ ունեցած հանդիպումը հիմնականում հենց այդ՝ ներկուսակցական խայտառակ ընտրություններին է վերաբերել:
«Ազգ»ի ՔՊ-ամերձ զրուցակիցն ասաց, որ ՔՊ-ական պատգամավորները Փաշինյանից պահանջել են, որպեսզի նա հետամուտ լինի ու անի հնարավորը մեղավորներին պատժելու, ընդհուպ մանդատից զրկելու հարցում: «Ի՞նչ է ստացվում, իշխանությունը, որ ամենից շատն ու ամենից հաճախն է խոսում ժողովրդավարությունից, այժմ, փաստորեն, ոչ ժողովրդավար ընտրություններ է կազմակերպում, ավելին՝ կուսակցության որոշ անդամներ իրենց իրավունք են վերապահում մյուս կուսակցականների վրա վարչահրամայական լծակներ բանեցնել: Հիմնականում մի քանի անձի անուն է շոշափվում, որոնց թվում են նաեւ պաշտպանության նախարար Սուրեն Պապիկյանն ու նրա թիմակիցները: Վերջիններս արել են հնարավորը, որ առողջապահության նախկին նախարար Արսեն Թորոսյանը վարչության կազմում չներառվի, աշխատել են այդ ուղղությամբ, բայց փաստորեն այդքան էլ լավ չեն աշխատել»,- ասաց մեր զրուցակիցն՝ իր հերթին զարմանք հայտնելով, որ Պապիկյանը, ցավոք սրտի, ներկուսակցական ինտրիգներով զբաղվելու ժամանակ ունի:
Տեղեկացանք նաեւ, որ խորհրդարանում վարչապետ-պատգամավորներ հանդիպման ժամանակ Փաշինյանը խոսել է Ֆրանսիայի նախագահ Էմանուել Մակրոնի ու Ռուսաստանի նախագահ Վլադիմիր Պուտինի հետ ունեցած հանդիպումների մասին: «Շատ տպավորված է եղել, ասել է՝ երկու նախագահներն էլ լավ են ընդունել ինձ, լսել են ամեն մի ասածս ու խոստացել են ամեն բան անել՝ հօգուտ Հայաստանի: Կարճ ասած՝ պատգամավորներին այնպիսի տրամադրություն է փոխանցել, որ թե՛ ՌԴ-ի, թե՛ Ֆրանսիայի նախագահները պարզապես հիացած են իրենով»,- նշեց մեր զրուցակիցը:
ՍԵՎԱԿ ՎԱՐԴՈՒՄՅԱՆ
