2022 թ. հոկտեմբերի 18-ին կյանքից հեռացավ լատվիացի բեմանկարիչ, Լատվիայի գեղարվեստի ակադեմիայի պատվավոր պրոֆեսոր Անդրիս Ֆրեյբերգսը:
Նա ծնվել էր 1938 թ.՝ Վիդենիեկիում, սակայն պատանի տարիքից ապրել եւ աշխատել Ռիգայում: Ձեւավորել է 200-ից ավելի բեմադրություն, այդ թվում՝ Երեւանում (Ռայնիսի «Փչիր քամի, քամի»` Գ. Սունդուկյանի անվան թատրոնում, 1983 ):
Ֆրեյբերգսը եղել է Ռիգայի դրամայի թատրոնի բեմադրող նկարիչը, ապա՝ Ռիգայի Պատանի հանդիսատեսի թատրոնի գլխավոր նկարիչը (1973-1992) եւ Լատվիայի ազգային օպերայի գլխավոր բեմանկարիչը (1992-2019): Աշխատել է նաեւ որպես բեմական հագուստի նկարիչ, համագործակցել Ալվիս Հերմանիսի, Անդրեյս Ժագարսի հետ: Նրա բեմական կոմպոզիցիաները աչքի են ընկել ճարտարապետական հստակ ձեւերով, տարածականությամբ, կերպարների ծավալային մոնումենտալ լուծումներով: Հինգ անգամ ճանաչվել է Լատվիայի լավագույն բեմանկարիչը, մեկ անգամ՝ Էստոնիայի, արժանացել Լատվիայի բարձրագույն՝ Երեք Աստղ շքանշանին (2003), Իտալիայի Il Premio Ubu բարձրագույն թատերական պարգեւին (2010): «Կրեդո» բալետի (Պենդերեցկու-Բախի երաժշտությամբ) մանրատիպարի համար արժանացել է «Պրահայի Կվադրենալե-95» ցուցահանդեսի Արծաթե մեդալին:
2021 թ. մարտին՝ հայ ժողովրդի համար ծանր ժամանակներում, նա միացավ լատվիացի մտավորականներին՝ կոչ անելով Ադրբեջանին արագացնել հայ գերիների եւ զոհերի մարմինների վերադարձը:
ԱՇՈՏ ԳՐԻԳՈՐՅԱՆ
