Այսօր պետք է գիտակցենք մի բան, որ ամեն ժողովրդի, ամեն մարդու պատմության մեջ դժբախտություններ են տեղի ունենում՝ կամա, թե ակամա, մեր կամքից անկախ։ Այսօր Հայաստանում տեղի է ունեցել դժբախտություն, ամենասուրբ օրը՝ ազատության, անկախության օրը վտանգված է։ Այս մասին «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը։
«Մենք պետք է արիանանք և գիտակցենք մի բան՝ ոչ մի նորմալ մարդ իր հայրենիքը հակառակորդին չի տա, պետք է գիտակցենք, որ նման իրավիճակում եղել ենք 1992թ., երբ հակառակորդը համարյա Ստեփանակերտն էր գրավում, նորից ուժ վերագտանք, անցանք առաջ, կարգի բերեցինք։ Երիտասարդությանը պետք է անպայման ասենք՝ երբեք մի մտածեք, թե մարդն ինչքան պետք է ապրի, կյանքից մահ մեկ վայրկյան է բաժանում, մենք պարտավոր ենք մեր երկիրը կարգի բերել, սերունդներին այնպիսի Հայաստան թողնել, ինչպիսին երազել ենք մենք։
Ամեն մի մարդ պետք է գիտակցի՝ հայրենիք սիրելը քիչ է, հայրենիքի համար պետք է պայքարել, թեկուզ՝ վերջին արյան գնով։ Այսօր մեր հայրենիքն օրհասական վիճակում է, բայց ես ձեզ վստահեցնում եմ՝ նորից կունենանք ուժեղ Հայաստան, նորից ուժ կվերագտնենք, կհաղթահարենք դժվարությունը, կունենանք այն երկիրը, որի մասին միշտ երազել ենք»,- նշեց Մանվել Եղիազարյանը՝ հավելելով, որ այսօր պետք է բոլոր եկեղեցիներով զանգակներ խփենք՝ կոչ անելով դուրս գալ երկրորդ Սարդարապատ, դա է այսօրվա հրամայականը։
Աղբյուր` Փաստինֆո
