«Ազգ»ի azg.am ինտերնետային կայքում 2019 ապրիլի 18-ին հրապարակել էինք «Ինչո՞ւ է աղմկում Շմ. Գրիգորյանը, կամ «հեղափոխական» Նազենի Ղարիբյանի հակահեղափոխական գործունեությունը» վերնագրով ընդարձակ հոդված Հայրենասեր Հայրենասերյան ստորագրությամբ, մաեստրո Կոստանտին Օրբելյանի նկատմամբ ձեռնարկված արշավի մասին, որտեղ շոշափվել էին նաեւ «Ալ. Սպենդիարյանի անվան օպերայի եւ բալետի ազգային ակադեմիական թատրոնի աջակցման» հիմնադրամի ու նրա տնօրեն Շմավոն Գրիգորյանի անունը, ինչը, ըստ վերջինիս փաստաբան Վահե Մնացականյանից խմբագրությանս ստացած պաշտոնական նամակի, նրա «պատիվը, արժանապատվությունը եւ գործարար համբավը» արատավորելու բնույթն ունի եւ «զրպարտություն է»:
Նամակում փաստաբանը խմբագրությունից պահանջում է azg.am կայքում հրապարակել իր պատրաստած հերքմնագիրը, ինչը եւ անում ենք ստորեւ, անշուշտ ուղղելով ուղղագրական ու կետադրական սխալները: Մանավանդ որ փաստաբանը իր նամակին կցել է նաեւ իրեն տրված լիազորագրի եւ փաստաբանների պալատի արտոնագրի պատճենները (վերջին բառը, ի դեպ, տարածված սխալովՙ «պատճե» ձեւով):
«ԱԶԳ»
«Կայքում 2019 թ. ապրիլի 18-ին հրապարակվել է «ԻՆՉՈՒ Է ԱՂՄԿՈՒՄ ՇՄ. ԳՐԻԳՈՐՅԱՆԸ, ԿԱՄ «ՀԵՂԱՓՈԽԱԿԱՆ» ՆԱԶԵՆԻ ՂԱՐԻԲՅԱՆԻ ՀԱԿԱՀԵՂԱՓՈԽԱԿԱՆ ԳՈՐԾՈՒՆԵՈՒԹՅՈՒՆԸ» հոդվածը, որում «Ալ. Սպենդիարյանի անվան օպերայի եւ բալետի ազգային ակադեմիական թատրոնի աջակցման» հիմնադրամի, ինչպես նաեւ վերջինիս տնօրեն Շմավոն Գրիգորյանի վերաբերյալ հայտնած տեղեկությունները իրականությանը չեն համապատասխանում:
Ավելին, լրատվամիջոցի լրագրողը արդեն իսկ իր տարիների գործունեության ընթացքում մեծ աշխատանք կատարած Հիմնադրամին եւ վերջինիս տնօրենին ուղղակիորեն մեղադրում է հանցագործության կատարման մեջ, չունենալով որեւէ փաստ: Սա այն դեպքում, որ Հիմնադրամը տարիների անբասիր աշխատանքը ապացուցել է իր գործունեության թափանցիկությամբ, ինչի անհերքելի հաստատումն է միջազգային հեղինակավոր աուիդիտորական ընկերությանՙ KPMG-ի (Քեյ-Փի-ԵՄ-ՋԻ) կողմից տրված ֆինանսական ծախսերի գերազանց գնահատականը:
Առավել եւս, որ լրագրողը որեւէ իրավունք չունի առանց փաստի տեղեկություն հայտնել մի հիմնադրամի մասին, որի վերաբերյալ նա որեւէ տեղեկություն չունի, եւ նույնիսկ չի փորձել ստանալ հիմնադրամի գործունեության մասին իրական տեղեկատվություն»:
