ՀՀ Գիտությունների ակադեմիայի Գրականության ինստիտուտը հրատարակել է հաստատության վաղեմի աշխատող, բանասիրական գիտությունների թեկնածու Ալվինա Արամյանի «Ակնարկներ հայ-իսպանական գրական եւ մշակութային հարաբերությունների պատմության. V-XX դդ.» ռուսերեն ժողովածուն:
Գիրքն ամփոփում է հեղինակի երկարամյա պրպտումների արգասիքը հանդիսացող տասնմեկ ակնարկ, որոնք ներկայացնում են Հայաստանի եւ Իսպանիայի, հայ եւ իսպանացի ժողովուրդների միջեւ եղած բազմադարյան պատմական, գրական եւ մշակութային առնչությունները: Դրանք ենՙ «Իսպանիան վաղ միջնադարի հայկական աղբյուրներում», «Կիլիկյան Հայաստանը եւ Իսպանիան», «Իսպանացի միսիոներների գործունեությունը հայ միջավայրում», «Հայաստանը Ժուրդեն դե Սեւերակի «Հրաշքների նկարագրության» մեջ», «Հայկական թեման Կլավիխոյի «Օրագրում», «Իսպանիան հայ ուխտագնացների եւ ճանապարհորդների ուղեգրական նոթերում (XV-XVIII դդ.)», «Գաբրիել Համազասպյանՙ Մարկ Ավրելիուսի «Ոսկե գրքի» թարգմանիչը ( XVIII դ.)», «Իսպանացի հեղափոխական Խուան վան Գալենի կովկասյան ոդիսականը», «Իսպանիան XIX դարի հայ լուսավորիչների ստեղծագործության մեջ» եւ «Սերվանտեսը հայ իրականության մեջ»:
Խիստ փափագելի կլինի Ալվինա Արամյանի սույն արժեքավոր ժողովածուն թարգմանված եւ հրատարակված տեսնել նաեւ իսպաներենով:
