ՎիվաՍել-ՄՏՍ ընկերությունը հյուրընկալել է աշխարհի մի շարք երկրներից ժամանած 21-ից 32 տարեկան 45 հայ երիտասարդ կամավորների: Զրուցելով ՎիվաՍել-ՄՏՍ-ի գլխավոր տնօրեն Ռալֆ Յիրիկյանի հետՙ երիտասարդները ծանոթացել են ընկերության հաջողության պատմությանը, հիմնարար արժեքներին, կորպորատիվ սոցիալական պատասխանատվության ռազմավարությանն ու Հայաստանի հեռահաղորդակցության ոլորտի զարգացումներին:
Անմիջական հանդիպումն է՛լ ավելի է ոգեւորել երիտասարդներիՙ հայրենիքը եւ սեփական արմատները բացահայտելու ցանկությունը: Ռալֆ Յիրիկյանի հետ զրույցի ընթացքում նրանք նաեւ խորհուրդներ են ստացել բիզնեսի ճիշտ կառավարման գործիքների վերաբերյալ:
«ՎիվաՍել-ՄՏՍ-ը ողջունում եւ բարձր է գնահատում երիտասարդ սփյուռքահայ կամավորներիՙ հայրենիք ացելելու որոշումը եւ Հայաստանի տարբեր մարզերում կամավորական տարբեր նախագծերի մասնակցելու պատրաստակամությունը: Պետք է հիշել, որ հաջողության հասնելու ուղին հեշտ չէ, սակայն հստակ նպատակներ, դրանց հասնելու համար քայլեր, համբերատարություն, պատասխանատվություն ու առողջ թիմ ունենալու դեպքում ամեն ինչ էլ հնարավոր է»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Երիտասարդ կամավորները կիսել են իրենց տպավորությունները եւ պատմել Հայաստան այցելելու իրենց պատճառների մասին: Ոմանք ցանկացել են պարզապես ծանոթանալ հայկական մշակույթին, մյուսները` սովորել հայերեն եւ ձեռք բերել փորձ իրենց հետաքրքրությունների ոլորտում, որոշներն էլՙ մնալ եւ ապրել Հայաստանում եւ իրականացնել տարբեր ծրագրեր ու նախագծեր Հայաստանի համայնքներում:
Հանդիպումն ուղեկցվել է հետաքրքիր հարց ու պատասխանով, քննարկումներով եւ ավարտվել ընկերության գլխամասային գրասենյակով շրջայցով:
«Դեպի Հայք» հիմնադրամի իրականացվող ծրագրերի շրջանակում, ընդհանուր առմամբՙ ՎիվաՍել-ՄՏՍ այցելել են երիտասարդների ավելի քան 25 խմբեր: «Դեպի Հայք» հիմնադրամը Հայաստանում գործում է 2004 թվականից ի վեր եւ արդեն ունեցել է 1900 մասնակից 50 տարբեր երկրներից:
