ՀԲԸՄ-ի Սաթամյան թատերախմբի հիմնադրման 40-ամյակը նոյեմբերի 9-ին հանդիսավոր պայմաններում նշվել է Կանոգա պարկի (Կալիֆոռնիա) Մանուկյան-Տեմիրճյան վարժարանի Նազարյան դահլիճում, որի ձեւավորման աշխատանքները կատարել էր Մանուկ Սաթամյանը :
Վարդան Նազիրյանի հովանավորությամբ անցկացված եւ 500-ից ավելի հանդիսատեսների ներկայությամբ երեկոն անմոռանալի պահեր է պարգեւել:
Թատերական հանձնախմբի նախագահ, բեմադրիչ եւ դերասան Գրիգոր Սաթամյանը ներկաներին ծանոթացրել է թատերական խմբի ստեղծման պատմության, գործունեության եւ առաքելության հետ, նշելով, որ մինչ օրս թատերախումբը 55 պիես է բեմադրել, 3 օպերետա, 5 ստենդ-ափ կատակերգություններ եւ տվել 3 համերգ:
Երաժշտա-գեղարվեստական մասում հանդես են եկել երգիչներ Սալբի Մայիլյանը , Ռուբեն Թելունցը եւ նրա երաժշտական դպրոցի ուսանողները: Երեք դերասաններ եւ մեկ բեմական ձեւավորող պարգեւատրվել են ողջ կյանքի ընթացքում ձեռք բերած նվաճումների, իսկ 6 դերասան-դերասանուհիներ էլՙ երկարամյա դերասանական կարիերայի համար:
Գնահատանքի վկայականներով մեծարվել են բարերարներ Վարդան Նազիրյանն ու Նազարեթ Քեվոնյանը, ձեռամբ համապատասխանաբար Սինան Սինանյանի եւ Երվանդ Տեմիրճյանի:
Իսկ երեկոյի ամենահիշարժան երեւույթը եղել է Գրիգոր Սաթամյանի ելույթը, որ կես ժամ անընդմեջ ծիծաղի պահեր է պարգեւել հանդիսատեսին, որի ուրախ տրամադրությունը կրկնապատկվել է, երբ հանպատրաստից բեմ է բարձրացել Գրիգորի դասընկերըՙ Տիգրան Էքիզյանը : Վերջինս կատակերգական երկխոսության է բռնվել տաղանդավոր կատակերգուի հետ եւ վերջում Սաթամյանին է նվիրել նրա ծիծաղկոտ դեմքի չուգունից պատրաստված քանդակը:
