ՆԱԽԱԳԱՀ ԱՐՄԵՆ ՍԱՐԳՍՅԱՆԻ ԶԱՏԿԱԿԱՆ ՈՒՂԵՐՁՆԵՐԸՙ ԶՈՒՅԳ ԿԱԹՈՂԻԿՈՍՆԵՐԻՆ

Նախագահ Արմեն Սարգսյանը Քրիստոսի հրաշափառ հարության տոնի առթիվ շնորհավորական ուղերձներ է հղել Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց կաթողիկոսին եւ Ն.Ս.Օ.Տ.Տ. Արամ Ա Մեծի Տանն Կիլիկիո կաթողիկոսին: Գարեգին Բ Ամենայն Հայոց կաթողիկոսին ուղղված ուղերձում նախագահ Սարգսյանը մասնավորապես նշել է. «Ներկայիս տագնապալի ժամանակներում, երբ նոր կորոնավիրուսի համավարակը մարդկանց կանգնեցրել է առողջական, սոցիալական ու տնտեսական լուրջ խնդիրների առջեւ, եւ մեր պետական հաստատություններն ու համապատասխան կառույցներն անում են հնարավոր ամեն ինչՙ դիմակայելու այդ վարակին, հանրությունը նմանապես կարիք է զգում Ձեր խոսքի եւ հորդորի: Այս պայմաններում Հայաստանյայց Առաքելական Սուրբ Եկեղեցին Ձեր հովվապետությամբ առավելագույն ճիգեր է ի գործ դնումՙ աջակից լինելու հավատացյալ ժողովրդին Հայաստանում, Արցախում եւ Սփյուռքում։ Մաղթենք զորություն հայոց պետությանը եւ Ձեր հայրապետությամբՙ Սուրբ եկեղեցուն, առողջություն ու ապահովություն մեր ժողովրդին»։ Մեծի Տանն Կիլիկիո Արամ Ա կաթողիկոսին ուղղվածՙ նախագահի խոսքում մասնավորապես ասվում է. «Ներկայիս բարդ ժամանակներում, երբ մարդիկ ստիպված են լարել իրենց ուժերն ու մեծ ջանքեր գործադրել, ավելի է մեծանում Եկեղեցու եւ հավատքի դերը մեր կյանքում։ Թող Տիրոջ Սուրբ հարության ավետիսը հարստացնի յուրաքանչյուրիս հոգին ու տունը, իսկ Ձեզ համար դառնա կենարար աղբյուրՙ ի փառս Հայոց Սուրբ եկեղեցու եւ ի ապահովություն մեր աշխարհասփյուռ ժողովրդի, Հայաստանի եւ Արցախի»։