«Բիանետ» լրատվական ցանցը Անկարայից տեղեկացնում է, որ թուրքական խորհրդարանի հայազգի պատգամավոր Կարո Փայլանը (ժողովրդա-դեմոկրատական HDP կուսակցությունից) օգոստոսի 10-ին խորհրդարանում հետաքրքրվել է, թե ինչու հայտնի հայ կոմպոզիտորի թաղումը 2009-ի օգոստոսի 8-ին տեղի չի ունեցել Դիյարբեքիրում, ըստ նրա կտակի դրույթների:
«Ապե Արամ» անունով ճանաչված Տիգրանը Դիյարբեքիրից 1915-ին արտաքսված հայ ընտանիքի զավակն է եղել, որն իր կտակում նշել է, որ ցանկանում է մահվանից հետո թաղվել իր նախնիների քաղաքում: Այդ ժամանակ նրա ցանկությունը չեն հարգել պատճառաբանելով, որ Թուրքիայի քաղաքացիություն չի ունեցել: 2019-ի օգոստոսին էլ, երբ Դիյարբեքիրի քաղաքապետՙ Սելջուկ Միզրակլիին (HDP կուսակցությունից) փոխարինել է կառավարության կողմից նշանակված մեկ այլ անձնավորություն, փակվել է Արամ Տիգրանի անունով գործող երաժշտանոցը:
Փայլանը Թուրքիայի մշակույթի եւ զբոսաշրջության նախարար Մեհմեթ Նուրի Էրսոյին հարցրել էՙ «կփորձե՞ք հիշատակը վառ պահել Արամ Տիգրանի նման մի արվեստագետի, որին որպես անձնավորություն սիրում է ժողովուրդը: Ինչո՞ւ թույլ չեք տալիս, որ իր կտակի համաձայն թաղվի Դիյարբեքիրում»: Նա պահանջել է կազմակերպել Արամ Տիգրանի աճյունը տեղափոխել Դիյարբեքիրՙ ըստ «Արմինյն Միրոր Սփեքթեյթր» շաբաթաթերթի օգոստոսի 15-ի համարի:
