ՍՈՒՐԵՆ ՏՈՆՈՅԱՆ
Հայաստանի Հանրապետության Ազգային Ժողովի ընտրություններին քաղաքական ուժերի եւ դաշինքների քարոզարշավը, հիմնականում, կառուցված է միմյանց քննադատելու, «հների» եւ «նորերի» բազմաթիվ սխալների, բացթողումների, իշխանական լծակները ոչ ճիշտ օգտագործելու, իրենց նեղ անձնական նպատակներին օգտագործելու համար: Ցավոք, քիչ են այն քաղաքական ուժերը, որոնք պատրաստ են, միասնաբար, 44-օրյա պատերազմի հետեւանքները վեր հանելու, մեր պետության վրա կախված անվտանգության մարտահրավերները վերլուծելու եւ դրանք հաղթահարելու իրատեսական լուծումների մասին մտորելու, խորհրդակցելու, այդ լրջագույն հարցերի համար մշակելու հստակ եւ հիմնավորված ծրագրեր:
Մենք, հատկապես այս ընտրություններին, մեծ լրջությամբ եւ խոհեմությամբ պետք է մոտենանք: Ձեւավորենք այնպիսի Ազգային Ժողով, որը կառաջնորդի ոչ միայն փրկելու մեր ազգին եւ պետությանը վերահաս վտանգներից, այլեւ վերականգնելու մեր ազգային արժանապատվությունը, ունենալու զարգացած հասարակութուն եւ տնտեսություն, կանխատեսելի ապագա: Քաղաքական ուժերի, միավորումների մոտեցումներից, ձգտումներից եւ ցանկություններից անկախ, ինքներս պետք է կողմնորոշվենք, թե նրանցից ովքեր կարող են մեզ տանել վերը նշված խնդիրների լուծման, ընտրություն կատարել ոչ թե անձնական նկրտումներից եւ շահերից ելնելով, այլ ազգային-պետական մտածողությամբ: Եթե մենք կերտենք զարգացած, ուժեղ, հարուստ ու ապագա ունեցող պետություն, կունենանք արժանապատիվ կյանք մեր երկրում:
Ես հավատում եմ, որ մենք ճիշտ ընտրություն ենք կատարելու եւ կունենանք մեր ժամանակներին համահունչ Հայաստան, կլուծվեն Արցախի, պետական անվտանգության, ազգային կենսական հարցերը:
