Անկախության տոնի միջոցառումը
Թեեւ վարչապետ Նիկոլ Փաշինյանը քննադատության բուռն ալիքի ներքո Ազգային ժողովի ամբիոնից ներողություն խնդրեց ու խմբագրեց իր իսկ միտքը (սեփական մտքերը կարճ ժամանակ անց խմբագրելն, ի դեպ, նրա մոտ բնավորության նման մի բան է), թե Անկախության օրը Հանրապետության հրապարակում գունագեղ տոնախմբություն է լինելու, այնուամենայնիվ գունագեղություն եղավՙ Ռուսաստանից պատվիրված հատուկ դրոնների միջոցով: Ըստ մամուլի հրապարակումներիՙ դրանց վարձակալության 10 րոպեն 110 հազար ամերիկյան դոլար արժի: Լուսային էֆեկտներով ոգեշնչող, պետականությանն ու ինքնությանը վերաբերող պատկերներ ստանալը էսթետիկ առումով գուցե հաճելի էր: Հանգամանքը սակայն, թե 10 րոպեի համար 100 հազարավոր դոլարներ են ծախսել դրոնների վրա, ուղղակի ստորացուցիչ է բոլոր այն ծնողների համար, որոնց երեխաները նմանատիպ դրոնների հարվածից են զոհվել:
Սեպտեմբերի 21-ի միջոցառման ավատրից հետո իշխանության ներկայացուցիչներին, ըստ մեր ունեցած տեղեկությունների, կառավարական կաբինետից հրահանգ է իջեցվելՙ հնարավոր բոլոր միջոցներով գովեստի խոսքեր ասել ոչ միայն միջոցառման կազմակերպիչներին, այլեւ անձամբ Փաշինյանին: Դա է պատճառը, որ իշխանավորները, մեկը մյուսի հետեւից ու իրար հերթ չտալով, սոցիալական ցանցերում հիացական գրառումներ են անում, գովեստի խոսքեր ասում «ճաշակով» համերգի կազմակերպիչներին ու խոնարհվում վարչապետ Փաշինյանի առջեւ, որ չնայած քննադատություներին, վիրավորական խոսքերին ու անեծքներինՙ չընկրկեց ու համերգը չեղյալ չհայտարարեց:
