Մեդֆորդի (Մասաչուսեթս) Թաֆթս համալսարանից պրոֆ. Քրիստինա Մարանջին «Միրոր-Սփեքթեյթրում» գուժում է մահը պրոֆ. Լյուսի Տեր-Մանվելյանի, որը տեղի է ունեցել սեպտեմբերի 20-ին:
Տեր-Մանվելյանը հիմնադիրն էր Թաֆթս համալսարանի Արվեստի եւ ճարտարապետության պատմության ֆակուլտետի Արթուր Դադյանի եւ Արա Օզտեմելի անվան հայկական արվեստի ամբիոնի, որի առաջին վարիչն էր դարձել 1984-ին: Ամբիոնը գործում է Հարվարդ, Մքգիլ, Բոստոն եւ Նորթիստերն համալսարանների համագործակցությամբ, որպեսզի հնարավոր լինի հայկական արվեստի պատմության դասընթացներ անցկացնել նաեւ այդ համալսարաններում:
Տեր-Մանվելյանը կրթությունն ստացել էր Ռադկլիֆի Հարվարդում, եւ դոկտորական պաշտպանել 1980-ին Բոստոնի համալսարանում: Նրա ատենախոսությունը համարվում է առաջինը նվիրված հայկական արվեստին, մասնավորապես Գեղարդի ճարտարապետությանն ու քանդակներին: Նա բազմաթիվ դասախոսություններ էր կարդացել հայ արվեստի պատմության վերաբերյալ եւ համեմատական ուսումնասիրություններ տրամադրել (1982-89 թթ.) արվեստաբանական բառարաններին եւ հանրագիտարաններին: Հատուկ ուշադրության են արժանի նրա հոդվածները հայկական գորգարվեստի պատմության վերաբերյալ: Նա պրպտող հետազոտող էր եւ անսովոր եռանդի տեր մի անձնավորություն, որ անշահախնդիր նվիրվածությամբ կենսունակ էր պահում հայկական արվեստի պատմությունը օտարներին ծանոթացնելու գործը:
