ՕՐԵՐ-ի բացառիկ համարը «Հերոսապատում» նախագծի շրջանակում ներկայացրել է 44-օրյա պատերազմից հետո լույս տեսած գեղարվեստական գրականությունը: Մեկ համարում ներկայացվել են մոտ 50 հեղինակների գրքեր, որոնց հիմնական մասը գեղավեստական ենՙ արձակ ստեղծագործություններ ու բանաստեղծություններ: Նաեւ տպագված են հատվածներ զոհված հերոսների եւ պատերազմին մասնակից հերոսների գրքերից: Հատկանշական է, որ այս գրքերի շարքում են երկու վեպ, որոնք իրական գույներով ներկայացնում են Արցախյան պատերազմն ու մեր հերոսներին, նրանց հերոսական պայքարի մանրամասներըՙ Գրիգոր Գրիգորյանի «Սեւուսպիտակ կազմով գիրքը» եւ Վահե Գեղամիի «Առաքյալները»: Տպագրված գրականության ցանկում մեծ տեղ են կազմում հուշագրություններն ու տարբեր հերոսներին նվիրված առանձին գրքերը: Նրանցից մեկում հերոսը իրավամբ հարցնում էՙ «Եղե՞լ է արդյոք մի պատերազմ, երբ այսքան էժան է զոհասեղանին դրվել զինվորի կյանքը, չգիտեմ… Ո՞վ էր այն ձեռքը, որ իրական մահվան երախ էր ճանապարհում տղերքին…»:
Այս համարում լույս են տեսել Տիգրան Նիկողոսյանի, Շանթ Նավոյանի, Գեղեցիկ Մարգարյանի, Տիգրան Բաբայանի, Հրաչյա Պապինյանի եւ Էլզա Կիրակոսյանի, Հռիփսիմէի, Գրիգոր Գրիգորյանի, Վահե Գեղամիի, Դիանա Հակոբյանի, Լիզա Բերքյան-Աբրահամյանի, Լեւոն Սահակյանի, Վաչագան Մանուկյանի, Թաթուլ Հակոբյանի, Լիկա Զաքարյանի, Մանվել Միկոյանի, Հասմիկ Հովհաննիսյանի, Ռաֆ Բարաթյանի, Խաչիկ Մանուկյանի, Կարեն Խուրշուդյանի, Արմինե Սարգսյանի, Վարդան Ամալյանի, Դավիթ Ամալյանի, Վարդան Պետրոսյանի, Նարինե Ավագյանի, Դավիթ Վանյանի, Աննա Մկրտչյանի, Գագիկ Գինոսյանի, Գոհար Մարտիկյանի ստեղծագործություններից: Ստեփանակերտի համալսարանի դասախոս Զարինե Սառաջյանը ներկայացրել է Արցախում եւ Երեւանում լույս տեսած մոտ 20 այլ գրքեր: Օրեր-ի խմբագրականում մասնավորապես նշվում է. «Այս հրապարակումները նաեւ կրթական ու դաստիարակչական կարեւոր նշանակություն ունեն: Դրանք ոչ միայն կյանքը ճիշտ ձեւով ապրելու ուղեցույց են, այլեւ հասկանալու, թե ինչո՞ւ զոհվեցին մեր տղաները եւ ի՞նչ պատգամ թողեցին ապրողներին»:
ՕՐԵՐ-ի այս համարում տեղ են գտել նաեւ հոդվածներ 44-օրյա պատերազմի հայ ռազմագերիներին նվիրված առաջին անգլերեն գրքի մասին ( Աշխեն Առաքելյանի «Սադիստական հաճույքներ. Ադրբեջանի լուռ հանցագործությունները» ), ինչպես նաեւ չեխ լրագրողուհիներ Կուտիլովայի եւ Կլիցպերովայի «Վերջինը հրկիզում է գյուղը. Պատերազմ Լեռնային Ղարաբաղում» գրքի մասին:
Համարի կարեւոր թեմաներից մեկն էլ նվիրված է Նախիջեւանի հայկական մշակութային ժառանգության կորստին, որը Անդրան Աբրահամյանը ներկայացնում է նախիջեւանագետ Արգամ Այվազյանի հետ հարցազրույցով: Այվազյանը նշում է, որ տասնամյակներ անց էլ հայերը դասեր չեն քաղում, եւ այժմ էլ նույն բախտին է արժանանալու Արցախը:
Համարի գլխավոր հարցազրույցի հերոսը նյույորքաբնակ հայտնի արվեստագետ Տիգրան Ձիթողցյանն է, որ ներկայացնում է ոչ միայն իր անցած ճանապարհը, այլեւ ՕՐԵՐ-ի հետ զրույցում անդրադառնում է Հայաստանի ներկա վիճակին, պատերազմի ժամանակ ցույց տված օգնությանն ու իր ապագա ծրագրերին: Ինչպես նշում է ամսագրի խմբագիր Հակոբ Ասատրյանը . «Մենք ցանկացել ենք Տիգրանի հաղթանակած կերպարով, որ ինքնուրույն կարողացել է հասնել Նյու Յորք եւ նվաճել միջազգային ճանաչում, նաեւ հույս ներշնչել մեր ժողովրդին, որ ոչինչ կորած չէ, եւ հայ ժողովուրդը մշտապես հաղթելու է իր մշակույթով ու ստեղծարար գործունեությամբ»:
Համարում տեղ են գտել նաեւ այլ հոդվածներ:
Հ.Գ. Ի դեպ, արտերկրում ապրող մեր հայրենակիցները կարող են բաժանորդագրվել ՕՐԵՐ եվրոպական ամսագիր եւ տարեմուտին նվիրել իրենց բարեկամներին: Տարեկան բաժնեգինըՙ 50 եվրո է:
Փոխանցումները կատարել ICKVE-ORER MAGAZINE
Account number: 68041001 / 2700
IBAN CZ 23 2700 0000 0000 6804 1001
SWIFT CODE – BACXCZPP
ՕՐԵՐ եվրոպական ամսագիր
