Ռուսաստանը գրեթե վերականգնել է ռազմական գործողությունների ընթացքի ապահովման համար անհրաժեշտ առանցքային արևմտյան միկրոչիպերի և էլեկտրոնիկայի ներկրման ծավալը՝ վերադառնալով նախքան Ուկրաինայում ռազմական գործողությունների մեկնարկը եղած ցուցանիշներին: Այս մասին, ինչպես գրում է Politico-ն, հայտարարել է Պետքարտուղարության՝ պատժամիջոցների հարցերով համակարգող Ջիմ Օ’Բրայենը՝ ընդգծելով, որ Մոսկվան ակտիվացրել է պատժամիջոցները շրջանցելու ջանքերը:
«Այս տարվա սկզբի դրությամբ Ռուսաստանը կարողացել է գրեթե նախապատերազմական մակարդակովներմուծել էլեկտրոնիկայի որոշ հիմնական կատեգորիաներ», – ասել է Ջիմ Օ’Բրայենը՝ նկատի ունենալով չիպերը, պրոցեսորները և ինտեգրալ սխեմաները, որոնք կարևոր են ժամանակակից զենքեր ստեղծելու համար:
Ըստ Օ’Բրայենի՝ խնդիրն այն է, որ եվրոպական ընկերություններն արտադրանքը վաճառում են այլ երկրներին, որոնք իրենց հերթին դրանք վերավաճառում են Ռուսաստանին:
«Պատժամիջոցների շրջանցումը մնում է էական խնդիր», – ասել է Օ’Բրայենը՝ հավելելով, որ ԱՄՆ-ն խնդիրներ է տեսնում հատկապես հինգ երկրի՝ Թուրքիայի, Ղազախստանի, Վրաստանի, Արաբական Միացյալ Էմիրությունների և Հայաստանի հետ:
Poilitico-ն հավելում է, որ մաքսային տվյալների համաձայն՝ Ռուսաստանի և Կովկասի ու Կենտրոնական Ասիայի մի քանի երկրների, այդ թվում՝ Վրաստանի, Ղազախստանի և Հայաստանի միջև առևտուրն աճել է Ուկրաինայում ռազմական գործողությունների մեկնարկից ի վեր:
