Հայաստանի վարչապետը հուլիսի 15-ին ընդունել է Միացյալ Նահանգների Կենտրոնական հետախուզական գործակալութան ղեկավարին: Նիկոլ Փաշինյանը և Ուիլյամ Բըրնսը, ըստ Հայաստանի կառավարության հաղորդագրության, քննարկել են միջազգային և տարածաշրջանային անվտանգությանը, ահաբեկչության դեմ պայքարին վերաբերող հարցեր, անդրադարձել Հարավային Կովկասում տեղի ունեցող գործընթացներին:
Բըրնսի հետ հանդիպել է նաևՀՀ Անվտանգության խորհրդի քարտուղար Արմեն Գրիգորյանը։ Նրանք քննարկել են Հայաստան-Միացյալ Նահանգներ երկկողմ հարաբերությունների հետագա զարգացումը: Հանդիպման ընթացքում, ըստ հայկական կողմի, Անվտանգության խորհրդի քարտուղարը ներկայացրել է տարածաշրջանային անվտանգության միջավայրը, առկա մարտահրավերները և տարածաշրջանում խաղաղության հաստատման Հայաստանի մոտեցումը։
«Այս համատեքստում կողմերը քննարկել են Հայաստան-Ադրբեջան և Հայաստան-Թուրքիա բանակցային գործընթացները», – ասված է հաղորդագրության մեջ։
