Սրանք խուլիգաններ են, գլուխս պտտվում է: Այս մասին այսօր՝ ապրիլի 30-ին, Նոր Նորքի ոստիկանության շենքից դուրս գալիս լրագրողների հետ զրույցում հայտարարեց ակտիվիստ Արթուր Չախոյանը:
«Հարձակվել են ինձ վրա, սրանք խուլիգան, թալանչի պիղծ իշխանություն են՝ թաղապետի գլխավորությամբ: Չեմ բացառում, որ վերջում պարզվի, որ ես եմ մեղավոր»,-ասաց նա՝ հավելելով, որ ինձ այս պահին ձերբակալվածի կարգավիճակում է:
Նա ոստիկանների ուղեկցությամբ նստեց շտապօգնության մեքենան եւ տեղափոխվեց հիվանդանոց:
Երևանի ավագանու «Մայր Հայաստան» խմբակցության անդամ Մեսրոպ Մանուկյանն էլ հայտարարեց. «Նոր Հայաստանում տուժողը դառնում է մեղադրյալ»:
Արթուր Չախոյանի աչքի տակ կապտուկ կար եւ արյան զեղման նշաններ:
Նշենք, որ այսօր առավոտյան թաղապետարանի շենքում աշխատակիցները՝ թաղապետի մասնակցությամբ ծեծի են ենթարկել Արթուր Չախոյանին: Ոստիկանության աշխատակիցները, որոնք ժամանել են շենք, բերման են ենթարկել միայն Չախոյանին: Ոստիկանությունից հայտնել են, որ Արթուր Չախոյանը հրավիրվել է ոստիկանության Նոր Նորքի բաժին՝ հաղորդում ներկայացնելու:
Երևանի քաղաքապետարանից, անդրադառնալով տեղի ունեցածին, նշել էին, որ բռնությունը ցանկացած դրսևորմամբ անընդունելի է, ընդ որում բռնությունը միայն ֆիզիկականը չէ:
Միջադեպից հետո Արթուր Չախոյանի աչքի տակ կապտուկ կար:
Infoport.am
