Օրերս Երեւանում «ՔՈԴԵ Սոցիալական Ձեռնարկատիրության Հաբ» (CODE-SE HUB) ՀԿ-ն կազմակերպվել էր «Սոցիալական ձեռնարկատիրություն (ՍՁ) եւ Աշակերտական սոցիալական ձեռնակատիրություն (ԱՍՁ)» ազգային ֆորում, ինչի ժամանակ ամփոփվեցին ոլորտի զարգացմանն ուղղված ծրագրի արդյունքները նախորդ երեք տարում։ Բացի այդ, այն հարթակ էր՝ քննարկելու Հայաստանում աշակերտական ՍՁ-ների զարգացման հնարավորությունները։
Աշակերտական սոցիալական ձեռնարկատիրությունը նոր ձեւաչափ է թե՛ կրթական ոլորտում, թե՛ բիզնես միջավայրում: Այն բիզնես գործունեություն է կրթական հաստատությունում՝ դպրոց, քոլեջ կամ տեխնիկական ուսումնարան, որ ղեկավարում են աշակերտները: Կուրատորի (ուսուցիչ, ձեռնարկատեր, ծնող) ուղղորդմամբ՝ աշակերտներն արտադրում եւ վաճառում են ապրանք կամ ծառայություն՝ սոցիալական խնդիրներ լուծելու համար: Գործնական, նորարարական այս մոտեցումն աշակերտներին հնարավորություն է տալիս ունենալ բիզնեսի փորձ, ինչպես նաեւ՝ խթանում է ձեռնարկատիրական մտածողությունն ու միաժամանակ զինում կարիերայի համար անհրաժեշտ հմտություններով:
«Ծրագրի թիրախային խումբը 14–18 տարեկաններն են։ Նրանք ավելի կրեատիվ են եւ ունեն նոր գաղափարներ: Աշակերտներն ապացուցել են, որ վաղ տարիքում հնարավոր է մտնել ձեռնարկատիրական ոլորտ եւ հաջողության հասնել: Մեր նպատակը նորարարություն բերելն է, ինչպես նաեւ՝ մտնել այնպիսի ոլորտներ, որտեղ սոցիալական ձեռնարկատիրությունը դեռ զարգացած չէ»,– ասում է «CODE-SE HUB»–ի համահիմնադիր եւ նախագահ Սուրեն Մխիթարյանը:
Ծրագրի մեկնարկից մինչեւ այս պահը ներգրավվել է 20-ից ավելի դպրոց։ 400-ից ավելի աշակերտ մասնացել է սոցիալական ձեռնարկատիրության թեմայով սեմինարների եւ ինտենսիվ դասընթացների, ՍՁ առցանց կրթական հարթակի միջոցով վերապատրաստվել են հարյուրավոր երիտասարդներ, ավելի քան 20 դասընթացավար եւ ուսուցիչ։ Սոցիալական 7 բիզնես գաղափար էլ ստացել է ֆինանսական աջակցություն մեկնարկի համար։
«Մեզ համար կարեւոր է հայ երիտասարդներին գիտելիքներ, հմտություններ փոխանցելը, ինչի արդյունքում նրանք կդառնան ակտիվ քաղաքացիներ եւ հաջողակ ձեռներեցներ։ Ջանում ենք ամեն կերպ խրախուսել նորարարական կրթությունը»,- ասում է Հայաստանում ԵՄ պատվիրակության նախագծերի կառավարիչ Դավիթ Ավագյանը:
Ֆորումի ընթացքում առանձին տաղավարներով ներկայացված էին նաեւ այն 7 ԱՍՁ–ները, որոնց մեծ մասը ծրագրի բոլոր փուլերն անցնելուց հետո արդեն ունեն արտադրանք կամ ծառայություն են մատուցում եւ դրանցից ստացած եկամուտն ուղղում են սեփական դպրոցում կամ համայնքում առկա խնդիրների լուծմանը: Այսպես՝ մի դպրոցի սաների արտադրած գինու եւ բնական չրերից պատրաստած շոկոլադների վաճառքից ստացված եկամտով մասամբ վերանորոգվել է դպրոցի մարզադահլիճը: Մեկ այլ դպրոցում աշակերտները մշակել են սեղանի ինտելեկտուալ խաղ, երրորդում՝ վերամշակված հումքից էկոպայուսակներ են արտադրում եւ այլն։
