Միանշանակ է, որ մեր համալսարանի նկատմամբ հետապնդումներ են իրականացվում, և միանշանակ է, որ իշխանությունները չեն հաշտվում այստեղ գրանցած պարտության հետ, Azg.am-ի թղթակցի հետ զրույցում ասաց Վ. Բրյուսովի անվան պետական համալսարանի պրոռեկտոր Ցոլակ Ակոպյանը։
Հիշեցնենք, որ այսօր դատախազությունը հայտնել էր՝ Բրյուսովի անվան պետական համալսարանի ռեկտորի ընտրությունների ընթացքում կատարված խուլիգանության և հոգաբարձուների խորհրդի նիստի ընթացքում թույլ տրված կեղծիքների դեպքերի առթիվ 2 քրեական գործ է հարուցվել։
«Մենք հենց այս պահին էլ պատրաստվում ենք հայտարարություն տարածել, որովհետև համալսարանի հոգաբարձուների խորհրդի նախագահ, նախկին փոխվարչապետ Համբարձում Մաթևոսյանը առ այսօր արձանագրությունը չի ստորագրել՝ չնայած նիստում արդյունքները հատատվել են, նիստի հետ կապված որևիցե բողոք չի եղել։ Հանձնաժողովի նախագահը եղել է ԿԳՄՍ նորանշանակ նախարար ժաննա Անդրեասյանը։
Կան նիստի բոլոր ձայնագրությունները, բոլորը ստորագրել են արձանագրության տակ, պարտված թեկնածուն շնորհավորել է և գնացել։ Այսինքն՝ որևիցե բան նիստի ընթացքում և դրանից հետո տեղի չի ունեցել, և դրանից երկու օր հետո, երբ արձանագրությունը պատրաստ էր, օգնականի միջոցով հանձնեցինք, որ խորհրդի նախագահը ստորագրի, նա տարօրինակ կերպով, անհիմն պատճառաբանությամբ չստորագրեց, գործընթացը ձգձգեց»,- նշեց Ցոլակ Ակոպյանը։
Մեր զրուցակցի խոսքով՝ արձանագրությունը նախկին փոխվարչապետին ուղարկվել է նաև էլեկտրոնային փոստի միջոցով, սակայն առ այսօր որևէ պատասխան չի ստացվել։
«Կարգի համաձայն՝ իր ստորագրելն այս պահին առ ոչինչ է, որովհետև, կրկնում եմ, նիստը կայացել է, արձանագրվել է, մենք քարտուղարի ստորագրությամբ ամբողջ փաթեթն ուղարկել ենք լիազոր մարմին՝ ԿԳՄՍՆ, ինչպես նաև կառավարության նիստի հաստատման։
Այս ամենից հետո երեկ տարածվեց դատախազության տարօրինակ հայտարարությունը։ Մենք չգիտենք՝ ինչ խախտումների մասին է խոսքը և հասկանում ենք, որ նիստի արդյունքների չհաստատման հարց է»,- նշեց Ցոլակ Ակոպյանը։
Վերջում բուհի պրոռեկտորը հավաստիացրեց, որ այս պահին ուսումնական պրոցեսը համալսարանում ընթանում է բնականոն հունով։
«Ռեկտորի պաշտոնավարման ժամկետը լրանում է 2023 թվականի հունվարի 11-ին, պայմանագրով պաշտոնավարման ժամկետը 5 տարի է, և դրանից հետո, բնականաբար, կարող են խնդիրներ առաջանալ, կառավարման ճգնաժամ հասունանա, դրա համար էլ պահանջում ենք,ո ր այս պրոցեսն արագ կասեցվի։ Հակառակ դեպքում իրավիճակը վնասելու է ուսումնական պրոցեսին և ճգնաժամ է հասունանալու»,- ամփոփեց Վ. Բրյուսովի անվան պետական համալսարանի պրոռեկտորը։
Հիշեցնենք՝ դեկտեմբերի 22–ին հայտնի դարձավ, որ Պետական վերահսկողության ծառայությունը Վալերի Բրյուսովի անվան պետական համալսարանում մի շարք խախտումներ է հայտնաբերել և տեղեկանքներ ներկայացրել ՀՀ գլխավոր դատախազություն հետագա ընթացքն ապահովելու համար։ Մասնավորապես, ըստ ՊՎԾ–ի, բուհի ռեկտոր Կարինե Հարությունյանն ինքն իրեն հատկացրել էր 5,44 մլն դրամի չափով պարգևատրում և լրավճար։
