Արդեն երկրորդ օրն է՝ համացանցի հայաստանյան տիրույթում մեծ իրարանցում է, երկրպագուները փորձում են թեկուզ մեկ կադր ֆիքսել համաշխարհային աստղ Ջենիֆեր Լոպեսի երևանյան այցից, լուսաբանել նրա երևանյան տեղաշարժը։ Նախօրեին երեկոյան մեգաաստղին լուսանկարել էին Երևանի Cascade Royal ռեստորանում։
Sputnik Արմենիայի հետ զրույցում ռեստորանի մենեջեր Մարի Վարդանյանը նշեց՝ իրենց համար մեծ անակնկալ էր հենց Ջեյ Լոյի գալը։ Սեղան ամրագրված էր, բայց ասել էին, թե նրա մենեջերներն են ընթրելու գալու, ուստի աստղի համար մենյուն նախապես որոշված չէր։
«Ջենիֆեր Լոպեսն ընտրությունը կատարել է մեր մատուցողի խորհրդով։ Որպես նախուտեստ մատուցվել է քամած մածուն, պանրի տեսականի, ձիթապտուղ, իսկ տաք ուտեստների ցանկից հայկական տոլմա, խորոված, սմբուկ թահինով և պանրային սոուսով հավ։ Նրան հատկապես հիացրել էին տոլման և թահինով սմբուկը»,- նշեց Վարդանյանտը։
