Հունիսի 5-ին Վաղարշապատում ի Տեր հանգչեց պատմաբան, վաստակաշատ մանկավարժ Լենա Ասրյանը։
Հոգեհանգիստը նախատեսված է հունիսի 7-ին` ժամը 18։00-ին, Էջմիածնի Սբ. Շողակաթ վանքում, իսկ վերջին հրաժեշտը` հունիսի 8-ին` ժամը 13։00-ին, նույն վանքից։
ԿԵՆՍԱԳՐԱԿԱՆ ԱԿՆԱՐԿ
Պատմաբան, վաստակաշատ մանկավարժ Լենա Զինավարի Ասրյանը ծնվել է 1940 թ. սեպտեմբերի 20-ին, Արցախի մայրաքաղաք Ստեփանակերտում: Սովորել է Էջմիածնի շրջանի Ջրառատ գյուղի միջնակարգ դպրոցում, ապա ընդունվել ԵՊՀ։ 1966 թ. ավարտելով ԵՊՀ պատմության ֆակուլտետը՝ 1966-2005 թթ. աշխատել է որպես պատմության ուսուցիչ` պատմական գիտելիքներով և հայրենասիրությամբ կրթելով հազարավոր սաների։ 1966-1967 թթ. դասավանդել է Էջմիածնի շրջանի Ոսկեհատ գյուղի, 1967-1971 թթ.՝ Էջմիածնի թիվ 3, 1971-1976 թթ.՝ Գորիսի թիվ 1 ութամյա և թիվ 4 միջնակարգ (համատեղությամբ՝ քաղաքային ժողկրթբաժնին կից մեթոդկաբինետի մեթոդիստ), 1976-1977 թթ.՝ Էջմիածնի շրջանի Մերձավան և Բաղրամյան գյուղերի միջնակարգ, 1977-1997 թթ.՝ Վաղարշապատի թիվ 11 միջնակարգ, 1997-1999 թթ.՝ Վաղարշապատի թիվ 3, 1999-2005 թթ.՝ Վաղարշապատի թիվ 1 միջնակարգ դպրոցներում:
Իբրև ԵՊՀ պատմության ֆակուլտետի 4-րդ կուրսի ուսանող` ակտիվ մասնակցել է 1965 թ. ապրիլի 24-ին Հայոց ցեղասպանության 50-րդ տարելիցի առիթով Ազգային զարթոնքի երևանյան մեծ ցույցին։ ՀՀ անկախացման գործընթացի ժամանակաշրջանում ղեկավարել է Մայր Աթոռ Սուրբ Էջմիածնի կիրակնօրյա դպրոցների ստեղծման և ուսումնական ծրագրերի մշակման գործը, 1990-1992 թթ. ամբողջացրել է Արարատյան հայրապետական թեմի՝ կրոնի դասավանդման դասընթացը՝ դառնալով այդ առարկայի՝ ՀՀ հանրակրթական համակարգում առաջին դասավանդողներից մեկը և նախապատրաստել Հայոց Եկեղեցու պատմություն առարկայի ներմուծումը հանրակրթական ծրագրի մեջ, ղեկավարել է դասավանդող մասնագետների հավաքման և վերապատրաստման գործընթացի մեկնարկը, 1993-1997 թթ. եղել է Սբ. Ներսես Շնորհալու անվան կիրակնօրյա վարժարանի հիմնադիր-տնօրենը, սերտորեն համագործակցել է Մայր Աթոռ Սուրբ Էջմիածնի համապատասխան կառույցների հետ` ձեռք բերելով հոգևոր դասի սերը և հարգանքը։
Լ. Ասրյանը խմբագրել է 8 մենագրություններ, որոնցից 6-ը տպագրվել են ԵՊՀ պատմության ֆակուլտետի գիտական խորհրդի երաշխավորությամբ և ԵՊՀ հրատարակչության կողմից, 2-ը` Մայր Աթոռ Սուրբ Էջմիածնում:
