Ի՞նչ է նշանակում «ադմինիստրատիվ հետևանքներ». ամեն ինչ սահմանին կանգնած զինվորականների գլխին չպետք է ջարդել. ռազմական փորձագետ

Պատերազմը չի ավարտվել, և ոչ ոք հստակ չի կարող պնդել՝ արդյոք մոտ ապագայում ռազմական գործողությունները կվերսկսվեն, թե ոչ։ Այդուհանդերձ, կան պարամետրեր, որոնց հետևելով՝ կարելի է որոշակի հետևություններ կատարել, որ առաջիկայում Ադրբեջանը պատերազմական նոր գործողությունների չի գնա, և մոտակա ամիսներին լայնածավալ պատերազմ չի լինի, Azg.am-ի թղթակցի հետ զրույցում ասաց ռազմական փարձագետ Մհեր Հակոբյանը։

«Օրինակ՝ Թուրքիայում նախընտրական վիճակը. սա պատերազմի հավանականությունը որոշակիորեն իջեցնող հանգամանք է, որովհետև պաշտոնական Անկարան այժմ զբաղված է լրիվ այլ հոգսերով, իսկ Ալիևը, որքան էլ հոխորտա, առանց Անկարայի լայն աջակցության նոր պատերազմի գնալ չի կարող։

Երկրորդ զսպող գործոնը պաշտոնական Թեհրանի կոշտ դիրքորոշումն է՝ ուղղված Բաքվին, որ Իրանը Հայաստանի հարավում սահմանների փոփոխություն թույլ չի տա։

Ակնհայտ է նաև ռուսական գործոնը, որովհետև թեկուզ ՌԴ-ն Արևմուտքի կողմից հալածյալի կարգավիճակում է, բայց ուկրաինական ճակատում նրա վիճակն այնքան կրիտիկական չէ, որ Ադրբեջանը կարողանա Արցախում ռուս խաղաղապահների նկատմամբ բռնություն կիրառել»,- ասաց Մհեր Հակոբյանը։

Ռազմական փորձագետի համոզմամբ՝ Ալիևը հիանալի հասկանում է, որ չնայած իր ուռճացված-հաղթական կերպարին՝ Ադրբեջանի ներսում տրամադրություններն այնքան էլ հուսալի չեն, և նոր պատերազմը կարող է անկանխատեսելի տարրեր ունենալ։

Անդրադառնալով Տեղ գյուղի մերձակայքում ադրբեջանական կողմի սադրիչ գործողություններից հետո Նիկոլ Փաշինայնի հայտարարությանը, որ «հանձնարարությունների կատարումը ձախողվել է, և իհարկե դրան պետք է հետևեն որոշակի ադմինիստրատիվ հետևանքներ», Մհեր Հակոբյանն ասաց.

«Թշնամու հետ սահմանային շփումները նոնսենս են. դրանք ընդհանրապես չպետք է լինեն։ Ռադիոկապով որոշակի շփումներ հնարավոր են՝ բայց ոչ ավելին։ Ո՞վ է տեսել, որ հենակետի ղեկավարը դիրքից առաջ գնա. նա այնտեղ կանգնած է՝ թշնամու ոտնձգությունը կանխելու, ոչ թե նրա հետ բանակցություններ վարելու կամ պետական սահմանի ապօրինի փոփոխություն թույլ տալու։

Ինչ վերաբերում է Փաշինյանի՝ «ադմինիստրատիվ հետևանքներ» որակմանը, դա ի՞նչ է նշանակում։ Գուցե իրավակա՞ն հետևանքներ։ Վստահ եմ, որ իշխանության ադմինիստրատիվ հետևությունները լինելու են ինչ-որ մեկին պատժելը։ Իհարկե, պետական սահմանին լուրջ միջադեպ է տեղի ունեցել, և պետք է քրեական գործ հարուցվի, քննվի։ Իմ պատկերացմամբ պետք է քրեական վարույթ իրականացվի։

Բայց ամեն ինչ սահմանին կանգնած զինվորականների գլխին չպետք է ջարդել։ Տեղ գյուղի մերձակայքում սահմանային միջադեպն անընդունելի է, բայց անընդունելի է նաև ամեն բան զինվորականների գլխին ջարդելը»,- ասաց ռազմական փորձագետը։