Արտակարգ դեպք Երևանում. թիվ 9 երթուղու տրոլեյբուսը բախվել է երկաթե սյանը և հրդեհվել. կան տուժածներ. shamshyan.com

Այսօր՝ մայիսի 11-ին, արտակարգ դեպք է տեղի ունեցել Երևանում։ Ժամը 18:00-ի սահմաններում Ռուբինյան 20 հասցեի դիմաց, թիվ 9 երթուղին սպասարկող տրոլեյբուսը, դեռևս անհայտ հանգամանքներում, բախվել է երկաթե սյանը:

Բախման հետևանքով տրոլեյբուսում հրդեհ է բռնկվել:

Օպերատիվորեն ժամանել են ՀՀ Ներքին գործերի նախարարության փրկարար ծառայության Երևանի թիվ 5 հրշեջ-փրկարարական ջոկատից 1 մարտական հաշվարկ:

Մինչ հրշեջների ժամանումը, կրակի տարածման դեմ պայքարել են տրոլեյբուսի վարորդն ու քաղաքացիները:

Օպերատիվորեն ժամանել են նաև ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի պարեկները՝ գումարտակի հրամանատար Գոռ Առաքելյանի գլխավորությամբ:

Դեպքի վայրում հավաքվածներն ասում էին, որ մի քանի տուժած քաղաքացիներ կան, որոնց օգնություն են ցուցաբերել քաղաքացիներն ու շտապօգնության բժիշկները:

Այս տեղեկությունը պարեկային ծառայությունը պարզում է, ինչպես նաև տրոլեյբուսի վարորդի ինքնությունը:

Դեպքին անդրադարձել է նաև ՀՀ ներքին գործերի նախարարության փրկարար ծառայությունը։

«Մայիսի 11-ին, ժամը 18։18-ին Ճգնաժամային կառավարման ազգային կենտրոն ահազանգ է ստացվել, որ Երևանի Ռուբինյանց փողոցում՝ «Ալմաստ» գործարանի մոտակայքում, տրոլեյբուսից ծուխ է նկատվում։
 
Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ։

Պարզվել է, որ թիվ 9 երթուղին սպասարկող տրոլեյբուսը դուրս է եկել ճանապարհի երթևեկելի հատվածից, բախվել էլեկտրական սյանը և բռնկվել»,- ասված է հաղորդագրության մեջ։